ەلباسى ن.نازاربايەۆ «100 ناقتى قادام» ۇلت جوسپارىندا كاسىبي مەملەكەتتىك اپپارات قۇرۋعا ايرىقشا توقتالىپ، بۇل باعىتتاعى مىندەتتەردى جۇيەلەپ بەرگەن بولاتىن. وسى باعىتتا جامبىل وبلىسىندا جوسپارلى جۇمىستار جاندانا تۇسۋدە. مەملەكەتتىك قىزمەتتەر ساپاسىن ارتتىرۋدا ىشكى باقىلاۋ شارالارىنىڭ دا ماڭىزى زور.

ىشكى باقىلاۋ شەڭبەرىندە تۇرعىندارعا قىزمەت كورسەتۋ جاعدايلارى زەردەلەنۋدە جانە قىزمەت كورسەتۋ ءتارتىبىن تۇسىندىرەتىن اقپاراتتىڭ بولۋى، قول جەتىمدىلىگى تۇراقتى باقىلانۋدا.

وبلىستىق، قالالىق، اۋداندىق دەڭگەيدە تۇسىندىرمە، وقىتۋ جانە تاجىريبەلىك كومەك جۇمىستارى تۇراقتى جۇرگىزىلۋدە. قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ جامبىل وبلىسى بويىنشا فيليالىندا 2018 جىلى «ەلەكتروندىق ۇكىمەت جانە ەلەكتروندىق قىزمەتتەر. مەملەكەتتىك قىزمەتتە اقپاراتتىق تەحنولوگيالاردى قولدانۋ. «سيفرلى قازاقستان» باعدارلاماسىن دامىتۋ» تاقىرىبىندا بىلىكتىلىگىن ارتتىرۋ كۋرستارىنان 54 قىزمەتكەر ءدارىس العان.

بيىلعى جىلى دا بۇل باعىتتاعى جۇمىستار جالعاسىن تاۋىپ وتىر.

سونىمەن قاتار 2018 جىلى مەملەكەتتىك كورسەتىلەتىن قىزمەت ستاندارتتارىنا ەنگىزىلگەن وزگەرىستەر مەن تولىقتىرۋلارعا سايكەس، وبلىس اكىمدىگىنىڭ قابىلدانعان 30 قاۋلىسىمەن 64 رەگلامەنت قايتا بەكىتىلىپ، وزگەرىستەر مەن تولىقتىرۋلار ەنگىزىلدى.

«مەملەكەتتىك كورسەتىلەتىن قىزمەتتەر تۋرالى» ق ر زاڭىنا سايكەس، مەملەكەتتىك كورسەتىلەتىن قىزمەت ستاندارتى قولدانىسقا ەنگىزىلگەننەن كەيىن، كۇنتىزبەلىك وتىز كۇن ىشىندە مەملەكەتتىك كورسەتىلەتىن قىزمەتتەر رەگلامەنتتەرى بەكىتىلۋى ءتيىس. اتالمىش زاڭ تالابى ورىندالماعانى ءۇشىن 2018 جىلى وبلىس اكىمدىگىنىڭ 6 باسقارما باسشىلارى تارتىپتىك جاۋاپكەرشىلىككە تارتىلعان.

اعىمداعى جىلى دا مەملەكەتتىك كورسەتىلەتىن قىزمەت رەگلامەنتتەرىن بەكىتۋ مەرزىمدەرى بۇزىلۋدا. زاڭ تالابى ورىندالماعانى ءۇشىن 2019 جىلى وبلىس اكىمدىگىنىڭ 2 باسقارماسىنىڭ جاۋاپتى قىزمەتكەرلەرى تارتىپتىك جاۋاپكەرشىلىككە تارتىلدى.

بارشاعا بەلگىلى، ەلىمىزدىڭ ەكونوميكاسىنىڭ دامۋ قارقىنىن جەدەلدەتۋ جانە سيفرلىق تەحنولوگيالاردى پايدالانۋ ەسەبىنەن حالىقتىڭ ءومىر ءسۇرۋ ساپاسىن جاقسارتۋ، سونداي-اق ۇزاق مەرزىمدى پەرسپەكتيۆادا قازاقستاننىڭ ەكونوميكاسىن بولاشاقتىڭ سيفرلىق ەكونوميكاسىن قۇرۋدى قامتاماسىز ەتەتىن تۇبەگەيلى جاڭا دامۋ باعدارىنا كوشىرۋگە جاعداي جاساۋ ماقساتىندا، 2017 جىلى «سيفرلىق قازاقستان» مەملەكەتتىك باعدارلاماسى قابىلداندى.

اتالمىش باعدارلامانىڭ نىسانالى ينديكاتورىنىڭ ءبىرى – ەلەكتروندى تۇردە ۇسىنىلاتىن مەملەكەتتىك قىزمەتتەر ۇلەسىن ارتتىرۋ، ياعني 2022 جىلعا دەيىن – 80%-عا جەتكىزۋ. سونىمەن قاتار، حالىقتىڭ سيفرلىق ساۋاتتىلىق دەڭگەيىن 83%-عا جەتكىزۋ. ەڭ ءبىرىنشى ماقسات، ەلەكتروندى ۇكىمەتتىڭ «ۆەب-پورتالى» مۇمكىندىكتەرىن حالىققا كەڭىنەن ناسيحات جۇمىستارىن جۇرگىزۋ. ەكىنشىدەن، ساۋالدارىمەن جۇگىنگەن قىزمەت الۋشىلارعا ساپالى اقپارات بەرە وتىرىپ، دۇرىس باعىت باعدارلاۋ. ۇشىنشىدەن، مەملەكەتتىك كورسەتىلەتىن قىزمەتتەرگە جاۋاپتى مامانداردىڭ بىلىكتىلىگىن ارتتىرۋعا باعىتتالعان تۇسىندىرمە جۇمىستارىن تۇراقتى جۇرگىزۋ.بۇل باعىتتا جۇيەلى جۇمىستار جالعاسۋدا.