«مەملەكەت ءوز تاراپىنان مەملەكەتتىك ءتىلدىڭ پوزيسياسىن نىعايتۋ ءۇشىن كوپ جۇمىس اتقارىپ كەلەدى. قازاق ءتىلىن كەڭىنەن قولدانۋ جونىندەگى كەشەندى شارالاردى جۇزەگە اسىرۋدى جالعاستىرۋ كەرەك. ءبىز 2025 جىلدان باستاپ ءالىپبيىمىزدى لاتىن قارپىنە، لاتىن الىپبيىنە كوشىرۋگە كىرىسۋىمىز كەرەك. بۇل – ۇلت بولىپ شەشۋگە ءتيىس ءپرينسيپتى ماسەلە. ءبىر كەزدە تاريح بەدەرىندە ءبىز مۇنداي قادامدى جاساعانبىز. بالالارىمىزدىڭ بولاشاعى ءۇشىن وسىنداي شەشىم قابىلداۋعا ءتيىسپىز جانە بۇل الەممەن بىرلەسە تۇسۋىمىزگە، بالالارىمىزدىڭ اعىلشىن ءتىلى مەن ينتەرنەت ءتىلىن جەتىك يگەرۋىنە، ەڭ باستىسى – قازاق ءتىلىن جاڭعىرتۋعا جاعداي تۋعىزادى». ەلباسىمىز ءوزىنىڭ 2012 جىلعى 14 جەلتوقسانداعى «قازاقستان – 2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا وسىلاي دەپ اتاپ كورسەتىپ، لاتىن الىپبيىنە كوشۋدىڭ قاجەتتىلىگىنە كەڭىنەن توقتالعان بولاتىن. ايتا كەتۋ كەرەك، جامبىل وبلىسىندا قازىرگى تاڭدا بۇل باعىتتا ناتيجەلى جۇمىستار اتقارىلىپ جاتىر.

رەسپۋبليكادا العاشقىلاردىڭ ءبىرى بولىپ ەلباسىنىڭ №637 جارلىعىمەن بەكىتىلگەن لاتىن گرافيكاسىنا نەگىزدەلگەن قازاق ءتىلى ءالىپبيىن جاڭا زامان تالابىنا ساي ينتەرنەت-تەحنولوگيالار مۇمكىندىكتەرىن پايدالانا وتىرىپ وقىپ، جازۋعا ۇيرەتۋ ماقساتىندا Qazalipbi.kz ونلاين وقىتۋ باعدارلاماسى ازىرلەندى.

ينتەرنەتتىڭ كەز كەلگەن براۋزەرلەرى مەن سمارت تەلەفوندار ارقىلى كىرۋگە بولاتىن Qazalipbi.kz ونلاين وقىتۋ باعدارلاماسى – قازاق ءتىلدى اۋديتورياعا، ياعني لاتىن گرافيكاسىنا نەگىزدەلگەن قازاق ءتىلى ءالىپبيىن ۇيرەنۋگە نيەت بىلدىرگەن كەز كەلگەن ازاماتتار ءۇشىن قولجەتىمدى، تەگىن، ۋاقىتى شەكتەۋسىز، تەوريالىق، پراكتيكالىق، باعالاۋ بولىمدەرى قامتىلعان 18 ساباقتان تۇرادى.

جاڭا ءالىپبيدى جەڭىل مەڭگەرۋگە ىقپال ەتۋ ماقساتىندا بارلىق اۋداندار مەن تاراز قالاسىندا سەمينار-ترەنينگتەر دە ءجيى ۇيىمداستىرىلۋدا.

سونىمەن قاتار، لاتىن گرافيكاسىنا نەگىزدەلگەن قازاق ءتىلى ءالىپبيىن مەيلىنشە حالىققا وڭايىراق ۇعىندىرۋ، ۇيرەتۋ ماقساتىندا باسقارمانىڭ «لاتىن نەگىزدى جاڭا ءالىپبي جانە جازۋ رەفورماسى» الەۋمەتتىك جوباسى اياسىندا جەرگىلىكتى تەلەارنالاردان «LatynLIVE» تەلەباعدارلاماسى ايىنا 2 رەت ەفيرگە شىعادى.

جالپى جىل باسىنان بەرى لاتىننەگىزدى ءالىپبيدى ءوڭىر تۇرعىندارىنا ءتۇسىندىرۋ ماقساتىندا 100-دەن ءىس-شارا وتكىزىلىپ، وعان ءتورت مىڭعا جۋىق ادام قامتىلعان.