دەنى ساۋدىڭ جانى ساۋ. ال دەنە ساۋ بولۋى ءۇشىن ونى ۇنەمى جاتتىقتىرىپ تۇرۋ قاجەت-اق. سوندىقتان سپورتپەن كارى دەمەي، جاس دەمەي بارلىق جاستاعى ەل ازاماتتارى اينالىسۋى كەرەك. پرەزيدەنت جولداۋىنان تۋىنداعان بۇل مىندەتتىڭ ۇدەسىنەن شىعۋدا جامبىلداعى سپورت مەكتەپتەرى جۇيەلى جۇمىسىمەن كوزگە تۇسەدى، دەپ جازادى Qamshy.kz اقپارات اگەنتتىگى. 

سوناۋ 1980 جىلى جاقسىلىقۇشكەمپىروۆتىڭ ماسكەۋ تورىندە وليمپ شىڭىن باعىندىرۋىمەن باستالعان جامبىلداعى سپورت مەكتەبىنىڭ داڭقى بۇگىندە الەمگە ءماشھۇر. اسىرەسە كۇرەس، بوكس سىندى سپورت تۇرلەرىنەن دارالانعان ساڭلاقتاردىڭ سارا جولى كەيىنگى جاستارعا ۇلگى، جەرلەستەرى ءۇشىن زور ماقتانىش.

–ءقازىر وبلىستا 48 سپورت مەكەمەسى جۇمىس اتقارادى. سپورت تۇرلەرى بويىنشا 6 سپورت كلۋبى، «بۇقارالىق-سپورتتىق شارالار وتكىزۋ ورتالىعى»، «جوعارى سپورت شەبەرلىگى مەكتەبى»، «وليمپيادا جەتكىنشەكتەرىن دايارلاۋ ورتالىعى»، «تاراز-ارەنا» سپورت سارايى، «وبلىستىق مامانداندىرىلعان دارىندى بالالار مەكتەپ-ينتەرناتى»،تالاس اۋدانىنداعى «دەنە شىنىقتىرۋ-ساۋىقتىرۋ كەشەنى»، قورداي اۋدانىنداعى «بۇقارالىق سپورتتىق ءىس-شارالار وتكىزۋ ورتالىعى» سىندى مەكەمەلەرى جانە 35 بالالار-جاسوسپىرىمدەر سپورت مەكتەبى جۇمىس جاسايدى. وڭىردەگى 30 سپورت مەكەمەسى اۋدان اكىمدىكتەرىنە قارايدى.

جالپى، وبلىستاعى سپورت مەكەمەلەرىندە سپورتتىڭ 43 ءتۇرى قامتىلعان. ونىڭ ىشىندە 24 وليمپيادالىق سپورت تۇرىنە جاتادى. ال سپورتتىڭ 12 ءتۇرى وليمپيادالىق ەمەس جانە قالعان 7 ءتۇرى سپورتتىڭ ۇلتتىق ءتۇرىن سانالادى. بۇل سپورت تۇرلەرى بويىنشا 925 وقىتۋشى-جاتتىقتىرۋشى 25 068 شاكىرتتى باپتايدى. مۇنداعى 16 136 سپورتشى جاس اۋىلداعى سپورت مەكتەبىندە تاربيەلەنەدى،–دەيدى وبلىس اكىمدىگىنىڭ دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ.

تالاي تاستۇلەكتى قياعا باپتاعان تاراز قالاسى مەن اۋدانداردا سپورتتىق سەكسياسى بار 22 اۋلا كلۋبى جۇمىس جۇرگىزەدى.ولاردىڭ جۇمىسىنا 48 جاتتىقتىرۋشى مەن 3000-نان استام سپورتشى تارتىلعان. سايكەسىنشە اۋلا كلۋبتارى قالا جاستارىنىڭ سالاۋاتتى ءومىر سالتىن ساقتاپ، بوس ۋاقىتتارىن سپورتقا ارناۋىنا مۇمكىندىك بەرەتىن ورىن رەتىندە قىزمەت كورسەتەدى.

تاۋەلسىزدىكتەن كەيىنگى جىلدارى ەرماحان يبراگيموۆ، باقتيار ارتايەۆ، عاني جايلاۋوۆ، زۋلفيا گابيدۋللينا، اقجۇرەك تاڭاتاروۆ، ەلدوس سمەتوۆ سىندى جامبىلدىق سپورتشىلار قازاقتىڭ اسپان تۇستەس بايراعىن جاھاندىق باسەكەلەردە بيىك كوتەردى. بەيبىت ىستىبايەۆ، ايبول ايتبەك، داۋلەتحان جاقىپوۆ سىندى سپورتشىلار قازاق كۇرەسىندە اڭىز بولىپ ايتىلاتىن ەسىمدەرگە اينالدى. سايكەسىنشە «اۋليەاتا»كوكپار كلۋبى مەن «ايشا ءبيبى» قىزدار سۋ دوبى كلۋبىنىڭ اتاق داڭقى دا الىسقا كەتتى.