جامبىل وبلىسىندا دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار سانى 337 مىڭ 3 ادامعا جەتتى. سايكەسىنشە بۇل وڭىردە قازاقستان رەسپۋبليكاسى پرەزيدەنتى قاسىم-جومارت توقايەۆتىڭ حالىققا ارناعان جولداۋىنداعى بۇقارالىق سپورتتى دامىتۋ تاپسىرماسىن تياناقتى ورىنداۋدىڭ بارلىق مۇمكىندىكتەرى بار ەكەندىگىن كورسەتەدى، دەپ جازادى Qamshy.kz اقپارات اگەنتتىگى. 

بۇگىندە سالا ماماندارى وبلىس تۇرعىندارىنىڭ 30 پايىزى سالاۋاتتى ءومىر سالتىن ۇستاناتىنىن راستايدى. ارينە ءبىر كەزدەرى چەمپيوندار ۇستاحاناسى سانالىپ، حالىقارالىق سپورتتىق ارەنادا تولايىم تابىستارىمەن قۋانتقان جامبىلدىقتار ءۇشىن بۇل قالىپتى كورسەتكىش سانالادى. ءارى بۇل كورسەتكىشتىڭ ناقتى تۇزىلگەنى كوڭىل قۋانتادى.

–وڭىردەگى دەنە شىنىقتىرۋ جانە سپورتپەن جۇيەلى تۇردە شۇعىلداناتىن، سالاماتتى ءومىر سالتىن وزدەرىنە بالا كۇننەن سەرىك ەتكەن جاستاردىڭ سانى 147،8 مىڭ ادامدى قۇرايدى. بۇل وڭىردەگى 14-29 جاس ارالىعىنداعى جامبىلدىقتاردىڭ 55،9 پايىزى. سونىمەن قاتار، سپورتپەن تۇراقتى شۇعىلداناتىن دەنە مۇمكىندىگى شەكتەۋلى ازاماتتار قاتارى بۇگىندە 3018 ادامعا جەتتى. بۇل وڭىردەگى جالپى دەنە مۇمكىندىگى شەكتەۋلى ادامداردىڭ 8،7 پايىزىنا تەڭ كورسەتكىش.

بۇقارالىق سپورتتى دامىتۋداعى نەگىزگى كورسەتكىشتىڭ ءبىرى جازعى سپورت تۇرلەرىنەن قازاقستان رەسپۋبليكاسى تۇڭعىش پرەزيدەنتى – ەلباسى تەستىلەرىن تاپسىرۋشىلار سانىنىڭ ءوسۋىن ايتۋعا بولادى. جىل باسىنان بەرى 392 مىڭ 900 جامبىلدىق سپورتتاعى ەڭ جوعارى سىنامانى تاپسىرعان، –دەيدى وبلىس اكىمدىگىنىڭ دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ.

حالىقتىڭ بۇقارالىق سپورتقا كوپتەپ ىنتا تانىتۋى ءۇشىن سپورتتىق نىسانداردىڭ قولجەتىمدىلىگىن ارتتىرۋ باستى ماسەلە. اعىمداعى جىلمەن كەلەر جىلدى قوسا العاندا وبلىس اۋماعىنداعى قوعامدىق ورىندار مەن اۋلالاردا، ساياباقتاردا 266 سپورت الاڭشاسىن سالۋ جوسپارلانعان. ونىڭ ىشىندە 174 الاڭشانى اعىمداعى جىلى پايدالانۋعا بەرۋ جوسپارلانسا بۇگىنگى كۇنگە 112 سپورت الاڭشاسى ىسكە قوسىلعان. ال قالعان 92 نىساننىڭ قۇرىلىسى كەلەسى جىلى اياقتالماق.

حالىققا قولجەتىمدى ورىنداردا سپورتتىق الاڭشالاردىڭ قۇرىلىسىن جۇرگىزۋدەن مەركى اۋدانى كوش باستاپ تۇر. ەسەپتى كەزەڭدە مۇندا 16 سپورتتىق الاڭشا پايدالانۋعا بەرىلگەن. سونىمەن بىرگە وبلىس ورتالىعىندا دا 14 جاڭا سپورتتىق الاڭ قالا تۇرعىندارىنا قىزمەت كورسەتۋدى باستادى. قوردايلىقتار دا سالاۋاتتى ءومىر سالتىن قالىپتاستىرۋ ىسىندە جاڭادان پايدالانۋعا بەرىلگەن 15 الاڭشانىڭ يگىلىگىن كورىپ جاتىر.