بۇگىندە جامبىل وبلىسىندا وڭدەۋشى كاسىپورىنداردىڭ قۋاتتىلىعى ارتىپ كەلەدى. بۇل ورايدا ولاردىڭ ونىمدەرىنە دەگەن نارىقتاعى جوعارى سۇرانىستى دا اتاپ وتكەن ءجون. 9 جىل بۇرىن مويىنقۇم وڭىرىندە قۇرىلعان «مىڭارال» سەمەنتى بۇگىندە قۇرىلىس ماتەريالدارى نارىعىندا جەتەكشى كاسىپورىن سانالادى، دەپ جازادى Qamshy.kz اقپارات اگەنتتىگى.
بۇل ينۆەستيسيالىق جوباعا فرانسيالىق كومپانيا 350 ميلليون اقش دوللار كولەمىندە قۇيىلعان. كاسىپورىننىڭ ونىمدەرى جەرگىلىكتى تۇرعىنداردىڭ كۇندەلىكتى سۇرانىسىن قامتاماسىز ەتۋمەن بىرگە «ەكسپو-2017» حالىقارالىق مامانداندىرىلعان كورمەسىندەگى قۇرىلىس نىساندارىن سوعۋ كەزىندە پايدالانىلدى. كومپانيا نەگىزىنەن نارىققا سۇرانىسىنا ساي سەمەنتتىڭ «م400 د20»، «م500 د0» ماركالارىن وندىرۋمەن اينالىسادى. مۇنداعى وندىرىستىك ۇدەرىستە تولىقتاي جاڭا تەحنولوگيالار قولدانىلادى. سونىڭ ەسەبىنەن «مىڭارال» سەمەنت زاۋىتى ءوز ونىمدەرىن قوسىمشا كۇيدىرۋ مەن «قۇرعاق» ءوندىرۋ ءادىسى شىعاراتىن بىردەن-بىر كاسىپورىنعا اينالدى. ءقازىر ءونىمدى وتكەرۋ ماقساتىندا زاۋىت باسشىلىعى حالىقارالىق ءاۆتودالىز بەن تەمىر جول تورابىنىڭ مۇمكىندىگىن مولىنان پايدالانىپ وتىر.
كاسىپورىندا وندىرىلگەن سەمەنت نەگىزىنەن قىرعىز، وزبەكستان رەسپۋبليكالارىنا ەكسپورتتالادى. ونىمدەردى تاسىمال ىسىندە كومپانيانىڭ زاماناۋي ۇلگىدە جابدىقتالعان ترانسپورتتىق پاركى كادەگە جارايدى. بۇل پاركتە ءقازىر دايىن ءونىمدى تاسىمالداۋعا ارنالعان 370 حوپپەر ۆاگونى بار.
–زاۋىتتا 300 ادام تۇراقتى جۇمىس ورنىمەن قامتىلعان. تاياۋ ارادا ونىدىرىستىك بازا ماڭىنان دايىن ءونىمدى استانا قالاسىنا وتكەرۋ بويىنشا جۇمىس جاسايتىن جاڭا تەمىر جول تەرمينالىنىڭ قۇرىلىسى جۇرگىزىلەدى. سول ارقىلى مىڭارالدىڭ سەمەنتى ەلىمىزدىڭ ءار ايماعىنداعى قارقىن العان قۇرىلىس الاڭدارىنا جونەلتىلمەك،–دەيدى «مىڭارال تاس كومپاني» جاۋاپكەرشىلىگى شەكتەۋلى سەرىكتەسىگىنىڭ باس ديرەكتورى مۇرتازا بۇلتاي.
زاۋىتتىڭ مويىنقۇم دالاسىندا ورنالاسۋىنىڭ دا وزىندىك سەبەپتەرى بار. ويتكەنى مۇندا سەمەنت وندىرىسىنە قاجەتتى شيكىزات سانالاتىن اك تاسى مەن ساز بالشىقتى تاقتاتاستىڭ مول قورى كەزدەسەدى.
العاشىندا جىلىنا 11 ميلليون توننا سەمەنت شىعارۋعا ەسەپتەلگەن زاۋىتتىڭ وندىرىستىك قۋاتتىلىعى 40 پايىزعا ۇلعايتىلدى. تەك وتكەن جىلدىڭ وزىندە كومپانيانىڭ ەكسپورتتىق الەۋەتى الدىڭعى جىلدارمەن سالىستىرعاندا 218 پايىزعا ءوسۋى سوزىمىزگە دالەل.بۇگىندە كاسىپورىن Vicat كومپانياسىنا ەنشىلىلەس 15 زاۋىتتىڭ ىشىندە ۇزدىك ءوندىرىس وشاعىنىڭ بىرىنە اينالىپ وتىر.
