قازاقستان رەسپۋبليكاسى تۇڭعىش-پرەزيدەنتى-ەلباسى جولداۋىندا زياتكەرلىك مەكتەپتەردىڭ تاجىريبەسىن ورتا ءبىلىم بەرۋ جۇيەسىندەگى ورتاق ستاندارتقا اينالدىرۋ قاجەتتىگىنە باسا ءمان بەرىلگەنى ءمالىم. اتالمىش تاپسىرماعا ساي وتكەن جىلى وڭىردەگى 40 مەكتەپ نازاربايەۆ زياتكەرلىك مەكتەبىنىڭ تاجىريبەسىن ەنگىزۋدىڭ بازالىق الاڭىنا اينالدى، دەپ جازادى Qamshy.kz اقپارات اگەنتتىگى. 

وسىدان 11 جىل بۇرىن ەلباسى باستاماسىمەن قۇرىلعان زياتكەرلىك مەكتەپتەردىڭ تاجىريبەسى وقۋشىلارعا مەكتەپ قابىرعاسىنان ناتيجەلى كاسىپتىك باعدار بەرۋگە نەگىزدەلگەن. سوعان ساي ورەندەرگە بولاشاقتا ءوزى تاڭداۋ جاساعان ماماندىق بويىنشا تەرەڭدەتىلگەن مازمۇنداعى ءبىلىم بەرىلىپ جاتىر.

اعىمداعى جىلى وسى مەكتەپتىڭ تاجىريبەسىمەن وڭىردەگى ءبىلىم بەرۋ وشاقتارىنىڭ 50 پايىزىن قامتۋ ماقساتىندا وبلىس اكىمدىگىنىڭ ءبىلىم باسقارماسى مەن پەداگوگيكالىق شەبەرلىك ورتالىعى جانە نازاربايەۆ زياتكەرلىك مەكتەبى اراسىندا ءۇش جاقتى مەموراندۋمعا قول قويىلدى. بىرىككەن جوسپارعا ساي جىل بويى بازالىق الاڭعا اينالعان مەكتەپتەردىڭ تاجىريبەسىن ايماققا تاراتۋ ءۇردىسى دە قالىپتاستى. ونداعى باسىمدىق ەڭ اۋەلى ۇستازدارعا كاسىبي قولداۋ جاساۋ بولىپ تابىلادى. مۇنان بولەك زامان اعىمىنا ساي وقۋشىلارعا اقپاراتتىق تەحنولوگيالار سالاسىندا ساپالى ءبىلىم بەرۋدە كۇن تارتىبىنە قويىلعان. وسىنداي بازالىق الاڭنىڭ ءبىرى سانالاتىن تاراز قالاسىنداعى №8 تولە بي اتىنداعى مەكتەپ گيمنازياسىندا قۇرىلعان «شىڭدالۋ» جەلىلىك قاۋىمداستىعىنا وبلىس ورتالىعىنداعى 11 ورتا مەكتەپ تارتىلعان. بۇل قاۋىمدامداستىقتا ۇستازدارعا جاڭارتىلعان مازمۇندا ءبىلىم بەرۋ، ۇرپاق تاربيەسىندە نازاربايەۆ زياتكەرلىك مەكتەپتەرىنىڭ ادىستەرىن ەنگىزۋگە قاتىستى وزەكتى ماسەلەلەر تالقىلانادى.

–وتكەن وقۋ جىلىندا ءبىز مەكتەپتەگى 1،2،3،5،6،7،8 سىنىپتارعا ءبىلىم بەرۋدە نازاربايەۆ زياتكەرلىك مەكتەبىنىڭ تاجىريبەسى قولدانىپ كوردىك. ناتيجەسى جامان ەمەس. سوندىقتان جاڭا جىلىنان باستاپ تولىقتاي وسى جۇيەگە كوشتىك. جالپى زياتكەرلىك مەكتەپتەردەگى ءبىلىم بەرۋ جۇيەسى زامان تالابىنا ساي باسەكەگە قابىلەتتى، ءبىلىمدى، ىسكەر تۇلعانى قالىپتاستىرۋعا نەگىزدەلگەنىمەن ەرەكشەلەنەدى. سونداي-اق، بۇل ءادىستىڭ تاعى ءبىر ءتيىمدى تۇسى وقۋشىلار ءوز بىلىمىندەگى ارتىقشىلىقتار مەن كەمشىلىكتەرگە ساي ارەكەت ەتۋىندە بولىپ وتىر،– دەيدى، تاراز قالاسىنداعى تولە بي اتىنداعى №8 مەكتەپ-گيمنازيا ديرەكتورىنىڭ عىلىمي-ادىستەمەلىك ءىسى جونىندەگى ورىنباسارى ءۇمىت جاقسىلىقوۆا.