قازاقستان رەسپۋبليكاسىنىڭ تۇڭعىش-پرەزيدەنتى –ەلباسى، Nur Otan پارتياسىنىڭ ءتوراعاسىنىڭ قاتىسۋىمەن وتكەن پارتيانىڭ نۇر-سۇلتان قالاسىنداعى «نۇر وتان» پارتياسىنىڭ كەزەكتى سەزدىندە «اۋىل – ەل بەسىگى» جوباسىنا باستاۋ الاتىندىعى ايتىلدى. سايكەسىنشە بۇل جوبانى قارجىلاندىرۋ كولەمىن 3 ەسەگە ارتتىرىپ، الداعى الداعى ءۇش جىل ىشىندە 90 ميلليارد تەڭگە ءبولۋدى تاپسىردى. ءدال وسى جوبانىڭ شاراپاتىن جامبىل وبلىسىنداعى ءۇش اۋدان ورتالىعى ايقىن سەزىنۋدە. شۋ اۋدانىنىڭ ورتالىعى تولە بي اۋىلىنا «اۋىل – ەل بەسىگى» جوباسى اياسىندا 2 ميلليارد 2 ميلليون تەڭگە قارجى قاراستىرىلىپ، جوسپارلى جۇمىستار جۇرگىزىلىپ جاتىر، دەپ جازادى Qamshy.kz اقپارات اگەنتتىگى. 

بيىل شۋ اۋدانىنداعى تولە بي اۋىلىندا ينفراقۇرلىممەن قامتۋ ماسەلەلەرىن شەشۋگە جوبا اياسىندا قاراستىرىلعان قارجىنىڭ 1 ميلليارد 418 ميلليون 689 مىڭ تەڭگەسىن يگەرۋ مەجە ەتىپ قويىلعان. ونىڭ 154 ميلليون 710 مىڭ تەڭگەسى وبلىس قازىناسىنان قاراستىرىلسا، قالعان بولىگى رەسپۋبليكالىق بيۋدجەتتەن ءبولىنىپ وتىر. بۇل قارجى تۇڭعىش-پرەزيدەنتتىڭ تاپسىرماسىنا ساي كولىك، اۋىز سۋ جانە گازبەن قامتاماسىز ەتۋ سياقتى ينفراقۇرىلىمدىق ماسەلەلەردى شەشىپ، مەكتەپ، اۋرۋحانا، سپورت الاڭدارىن سالۋعا جانە جوندەۋگە جۇمسالۋدا.

شۋ اۋدانىنىڭ ورتالىعى سانالاتىن تولە بي اۋىلىندا 20 مىڭنان استام تۇرعىن بار. ولار ءۇشىن كوشەلەردىڭ جارىقپەن قامتاماسىز ەتۋ ەڭ وزەكتى ماسەلە سانالادى. پارتيالىق جوبا اياسىندا بۇل ماسەلە تۇبەگەيلى شەشىمىن تاپتى. اتاپ ايتقاندا تولە بي اۋىلىنداعى 20،6 شاقىرىمدى قۇرايتىن 11 كوشەنى جارىقتاندىرىلدى. سونىمەن قاتار ۇزىندىعى 22،4 شاقىرىم بولاتىن 24 كوشەگە ورتاشا جوندەۋ جۇمىستارى جۇرگىزىلدى. ءقازىر بۇل جۇمىستار كەستەگە ساي قولعا الىنۋدا.

اتالعان جوبا اياسىندا م.اۋەزوۆ اتىنداعى ورتا مەكتەبى مەن تەحنيكالىق شىعارماشىلىق ورتالىعىنىڭ عيماراتى، «اسەم» بالاباقشاسىنىڭ شاتىرىن كۇردەلى جوندەۋدەن وتكىزۋ جۇمىستارى قولعا الىندى. سونىمەن قاتار الداعى ۋاقىتتا تولە بي اۋىلىندا جەرگىلىكتى تۇرعىنداردىڭ سۇرانىسىنا ساي «سالتانات سارايى»، امبەباپ زالى بار دەنە شىنىقتىرۋ-ساۋىقتىرۋ كەشەنىمەن بىرگە اۋىلداعى ورتالىق اۋداندىق اۋرۋحانا ماڭىنان ەمحانا بوي كوتەرەدى. تولە بي اۋىلىنىڭ تۇرعىندارى پارتيالىق جوبا اياسىندا وزدەرى كوپتەن كۇتكەن تۇيتكىلدەردىڭ ءتۇيىنى تارقاعانىنا ريزاشىلىق بىلدىرۋدە. ال وتپەلى قۇرىلىس نىساندارىنداعى جۇمىستار جەرگىلىكتى بيلىكتىڭ ءجىتى نازارىنا الىنعان.