جامبىل وبلىسىندا بادامشا (ميندال) ءوسىرۋ ءىسى قولعا الىنباق. وزبەكستان جەرىندە عانا وسىرىلەتىن، ميندال ءدانى كوپشىلىك ءۇشىن اسا جەڭسىك اس سانالادى. باعاسىنىڭ قىمباتتىعىنا قاراماستان وسىمدىكتىڭ وسى ءبىر تۇرىنە سۇرانىس جوعارى. ەندىگى كەزەكتە ءونىمنىڭ ءدال وسى تۇرىنە دەگەن جەرگىلىكتى تۇرعىنداردىڭ سۇرانىسىن وتەۋگە جامبىلدىق شارۋالار مىقتاپ كىرىسپەك، دەپ جازادى Qamshy.kz اقپارات اگەنتتىگى.
بۇل باستامانى جاقىندا عانا وزبەكستان رەسپۋبليكاسىنان جۇمىس ساپارىنان ورالعان وبلىستىق كاسىپكەرلىك پالاتاسىنىڭ ديرەكتورى ولجاس قارجاۋوۆ كوتەرىپ وتىر.
–ءبىزدىڭ وبلىستىڭ كليماتىندا بادامشا ءدانىن (ميندال) وسىرۋگە ابدەن بولادى. وكىنىشتىسى سول شارۋالار تاراپىنان كاسىپتىڭ بۇل تۇرىنە قىزىعۋشىلىق جوق. ەسەسىنە ساۋدا ورىندارىندا كورشى ەلدەن نەبارى ءار كەلىسى 3500-3800 تەڭگەگە اكەلىنگەن بادامشا 5500 تەڭگەگە ساۋدالاپ جاتىر. ءقازىر وبلىس اكىمىنىڭ باستاماسىمەن اۋىل تۇرعىندارىنىڭ اۋلاسىنداعى 10 سوتىق جەردى ماقساتتى پايدالانۋ ماسەلەسى كوتەرىلۋدە. وسى جەرگە بادامشا ءدانى وسەتىن تالدى ەگىلسە ءتورتىنشى جىلدان باستاپ ءونىم جيناۋعا بولادى. العاشقى جىلدارى ءار تالدان 8 كەلى ءونىم جينالادى. بىرنەشە تال ەگىپ ودان جينالعان ءونىمدى جوعارى دا كورسەتىلگەن باعادا ساۋدالاۋ كول-كوسىر پايدا اكەلەدى ەمەس پە؟ ءوز كەزەگىندە بۇل جوبانى ىسكە اسىرۋدا وزبەكستاندىق ارىپتەستەرىمىز كومەك كورسەتۋگە ءازىر. شارۋالار دا داقىلدىڭ وسى ءبىر ەرەكشە ءتۇرىن ەگۋ تاجىريبەلەرىمەن بولىسپەك، –دەدى وبلىستىق كاسىپكەرلەر پالاتاسىنىڭ ديرەكتورى ولجاس قارجاۋوۆ.
ونىڭ ايتۋىنشا وزبەكستان تاراپىمەن ءقازىر 10 000 ءتۇپ بادام كوشەتىن اكەلۋ ماقساتىندا كەلىسسوزدەر جۇرگىزىلىپ جاتىر ەكەن. ەگەر بۇل كەلىسسوزدەر ناتيجەلى اياقتالسا جامبىلدىق شارۋالار قاراشا ايىندا بادامشا ەگۋ جۇمىستارىن باستاۋعا دايار. ازىرگە بادام كوشەتتەرىن جامبىل اۋدانىنداعى جەرى قۇنارلى، كليماتى وڭتايلى ايشا ءبيبى اۋىلىنا ەگىلمەك. ال قالعان بولىگىن مەركى اۋدانىنا جەرسىندىرۋ جوسپارلانىپ وتىر.
جالپى كورشىلەس تۇركىستاندىق شارۋالاردا بادام جاڭعاعىن ءوسىرۋ تاجىريبەسى بار. بادام اعاشتارى 100 جىلعا دەيىن قۋراماي تۇرا بەرەدى. ونىڭ العاشقى 30-40 جىلىندا بۇل اعاشتان وتە مول ءونىم الۋعا بولادى. داستارحاننىڭ ءسانى بولۋىمەن بىرگە بادام جاڭعاعىنىڭ دانىندە كەزدەسەتىن ەفير مايى دەنساۋلىققا وتە پايدالى. قازاقستاندا جاڭعاقتى بۇل ءتۇرىنىڭ «دەسەرتنىي”، “يالتينسكيي”، “ۋگامسكيي”، “نيكيتسكيي”، “ۋروجاينىي» دەپ اتالاتىن سۇرىپتارى وڭاي جەرسىنەدى.
