رۋس قوعامىنىڭ ەل بولعالى ەرمەك ەتكەن ءبىر قاعيداتى – قولدان قۇداي جاساۋ تەحنولوگياسى. پاتشالىق رەسەيدىڭ دىنمەن نە ءۇشىن اراز بولعاندىعىن ەندى تۇسىنگەن شىعارسىز. سەبەبى ناعىز قۇداي تۇرعاندا جاساندى قۇدايلارعا ءسىرا دا ورىن جوق. ءدىننىڭ تانىمدىق ( «تاۋحيد» (اللاعا سەرىك قوسپاۋدىڭ) نەگىزگى ماقسۇتى دا وسى-تۇعىن. ارعىسى نيكولاي، بەرگىسى لەنين مەن ستاليندەر دە جوعارىداعى پەرعاۋىندىق تەحنولوگيانىڭ كەزەكتى ونىمدەرى بولاتىن. ەندى ويلانىپ كورىڭىز، «قۇداي» ءوزىنىڭ ناعىز قۇداي ەكەندىگىن سەزىنۋ ءۇشىن وعان قۇلشىلىق ەتۋشى، دالىرەك ايتساق، تۇلا بويىمەن ءتاۋ ەتىپ تابىنار توبىر كەرەك. ءبىزدىڭ ءالى كۇنگە پايىمداي الماعان توتاليتارلىق رەجيم تابيعاتىنىڭ بار قۇپياسى وسى عانا. ونىڭ پاتشاعا ماداق، حالىققا تاماق (كەي كەزدەرى تاياق) اتتى قوس تاسىلدەن تۇراتىن قاراپايىم عانا مەحانيزمى بار.
ەندىگى اڭگىمە ءالحامىن ءوز ومىرىمىزگە قاراي بۇرساق. ءبىز وسى لاقتىرعان تاسىمىزدىڭ ءبىر باسىنا بىرنەشە نەسيە (كرەديت) جۇكتەگەن قازاققا تيۋىنەن نەندەي تاقسىرەتتى اڭعارارىپ وتىرمىز؟ الۋعا جەڭىل، ايتۋعا وڭاي وسى ءبىر ءىستىڭ تاقىلەتىمىزگە تۇسىرگەن سالماعى جايىندا ءبىر ساتكە بولسىن ويلانىپ كوردىك پە ءوزى؟ ارينە، بۇعان بولا باس اۋىرتپايتىنىمىز تاعى دا ايدان انىق قوي. مۇمكىن سانا سەزىمىمىزدىڭ مەملەكەتتىك مازمۇنعا ۇلاسىپ، ۇلت پەن ۇرپاق حاقىندا ويلاي الماۋىمىزدىڭ ەڭ تالماۋ تۇسى دا وسىندا جاتقان بولار.
ايتەۋىر بار بىلەتىنىم، تىرشىلىك قازىعىنا ارقاندالعان جانباعار حالىقتىڭ ويلاۋ مەن وي جاڭالاۋعا (وقۋعا) دەگەن ۋاقىتىنىڭ جوقتىعى. حالىقتى ماڭگىلىككە قۇل ەتىپ ساناسىنا شىرە، تاقىمىنا بۇراۋ سالىپ، تىرپ ەتكىزبەي تۇنشىقتىرۋدىڭ ەڭ عاجايىپ ءتاسىلى دە وسى. وكىنىشتىسى سول، «ويلاندىرماۋ» ويىنىنىڭ ويىنشىعىنا (قۋىرشاعىنا) اينالعان بىزدەرگە قالعانى – تەك جاساندى «جاراتۋشىلارعا» ارناپ جاپپاي جاراپازان ايتۋ. وسى جولدا قاستەرلى عىلىم مەن قاسيەتتى ءدىندى دە اياۋسىز بۇرمالاپ، وتپەلى ساياساتتىڭ قولجاۋلىعىنا اينالدىرىپ باقتىق. مەملەكەت ساياساتى عىلىم مەن يمانعا بەيىمدەلمەي، كەرىسىنشە ءدىن مەن عىلىمدى وزدەرىنىڭ ولەرمەن پيعىلىنا قاراي بەيىمدەدى. ەلدى ەل ەتەتىن دە وسى ەكى قۇندىلىق ەدى عوي. ەندى نە بولار ەكەنبىز؟ الدە جيىرما ءتورت ساعات بويى ءبىر دامىل تاپپاستان «دامىپ جاتىرمىز» دەيتىن تەلەديداردىڭ ايتقانىنا سابيدەي سەنىپ وتىرساق پا ەكەن؟..
ىقىلاس وجاي ۇلى
پىكىر قالدىرۋ