الماتى قالاسى اكىمدىگىنىڭ باسپا ءسوز ورتالىعىندا ق ر پرەزيدەنتىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىن، ق ر 2015-2025 جىلدارعا ارنالعان سىبايلاس جەمقورلىققا قارسى ستراتەگياسى ساياساتىن، قوعامدىق سانانى مودەرنيزاسيالاۋ: ادالدىق پەن پاراساتتىلىق قاعيدالارىن دامىتۋ ماسەلەلەرى بويىنشا بريفينگ ءوتتى، دەپ جازادى قالالىق اكىمدىكتىڭ باسپا ءسوز قىزمەتى.

بريفينگ بارىسىندا الماتى قالاسى بويىنشا سىبايلاس جەمقورلىققا قارسى ءىس-قيمىل دەپارتامەنتىنىڭ سىبايلاس جەمقورلىقتىڭ الدىن الۋ جانە پاراساتتىلىق باسقارماسىنىڭ باسشىسى ەلنار يگىلىكوۆ ۇلتتىق ەكونوميكانىڭ دامۋى مەن حالىقتىڭ تۇرمىس جاعدايىنىڭ جاقسارۋى سىبايلاس جەمقورلىقتىڭ دەڭگەيىنە قاتىستى ەكەنىن، ال ونى تۇبەگەيلى جويۋ ءۇشىن ءاربىر سۋبەكتىگە جاۋاپكەرشىلىك جۇكتەلەتىنىن اتاپ ءوتتى.

ءاربىر ازامات، مەملەكەتتىك ورگان، كۆازيمەملەكەتتىك سەكتور سۋبەكتىسى، قوعامدىق بىرلەستىكتەر وسىناۋ الەۋمەتتىك كەلەڭسىز جايتپەن كۇرەسىپ، ونىڭ بارلىق كورىنىستەرىنە توزىمسىزدىك تانىتۋلارى ءتيىس. ۇيىمنىڭ باستاماسىمەن سەگىز وقيعانىڭ ۇشەۋىنە باتىلدىقپەن تالداۋ جۇرگىزىلدى. مەملەكەتتىك ورگانداردىڭ وسىنداي باتىلدىق تانىتۋى ۆەدومستۆولىق مۇددەدەن اتتاپ ءوتىپ، جەمقورلىقتىڭ سەبەپتەرى مەن شارتتارىن جويادى جانە قوعامنىڭ قاجەتتىلىكتەرىنە ساي كەلەتىن پروبلەمالىق ماسەلەلەردى انىقتايدى.

«بارلىق ازاماتتاردى، مەملەكەتتىك ورگاندار باسشىلارىن، ۇيىمدار مەن كۆازيمەملەكەتتىك سەكتور سۋبەكتىلەرىن قول جايىپ وتىرماي، جەمقورلىقتىڭ الدىن الىپ، ونىڭ وسال جەرلەرىنە تالداۋ جاساۋعا، سىبايلاس جەمقورلىققا ىقپال ەتەتىن سەبەپ-سالدارلاردى جويۋعا شاقىرامىن»، – دەپ قورىتىندىلادى ءسوزىن دەپارتامەنتتىڭ سىبايلاس جەمقورلىقتىڭ الدىن الۋ جانە پاراساتتىلىق باسقارماسىنىڭ باسشىسى ەلنار يگىلىكوۆ.

الماتى قالاسىنىڭ باس يمامى ەركىنبەك شوقاي مەشىت قىزمەتكەرلەرى اراسىندا جەمقورلاردىڭ جوق ەكەنىن، سونىمەن قاتار ءدىننىڭ كومەگىمەن جەمقورلىقپەن قالاي كۇرەسۋگە بولاتىنىن ايتتى.

– بەلگىلى ءبىر جۇما كۇندەرى يمامدار رەسپۋبليكا بويىنشا مەشىتتەردە ناقىل سوزدەر ايتادى جانە يسلامداعى پاراقورلىقتىڭ كەسىرى، جەمقورلىقتىڭ ادام مەن قوعامعا قانشالىقتى زيان كەلتىرەتىنى، جەمقورلىقتىڭ مەملەكەتتى قۇلاتۋى مۇمكىن ەكەنى تۋرالى پايدالى ۋاعىزداردى وقيدى. بۇل – ءبىزدىڭ سىبايلاس جەمقورلىققا قارسى جۇرگىزىپ وتىرعان شارالارىمىزدىڭ ءبىرى. الماتىدا، مىسالى، جۇما كۇنى 50-60 مىڭ ادام جينالادى جانە ءبىز ولارعا وسى اقپاراتتى جەتكىزەمىز، – دەدى ەركىنبەك شوقاي.

بريفينگ بارىسىندا «ىزگىلىك ەلشىسى» جالپىۇلتتىق قوزعالىسىنىڭ كۋراتورى اينۇر سابيتوۆا سىبايلاس جەمقورلىققا قارسى كۇرەس قىزمەتىنىڭ ءتوراعاسى اليك شپەكبايەۆتىڭ قاتىسۋىمەن 7 قازاندا تۇساۋكەسەرلەرىنىڭ بولعانىن ءارى جۇمىستارىنىڭ باستالعانىن ايتتى. بۇگىنگى كۇنگە دەيىن 120-عا جۋىق ۆولونتەر جوباعا قاتىسۋدا، izgi.kz پورتالى ىسكە قوسىلعالى بەرى قوزعالىسقا قاتىسۋعا نيەت بىلدىرۋشىلەر سانى ارتۋدا.

جوبا وسكەلەڭ جاس ۇرپاقتىڭ بويىنا ادالدىق، ءوز وتانداستارىنا، ەڭبەككە دەگەن سۇيىسپەنشىلىك، مەيىرىمدىلىك قاسيەتتەرىن دارىتاتىن بولادى.

«جاس ۇرپاقتى ەلىمىزدىڭ قوعامدىق ومىرىنە كەڭىنەن تارتۋ قاجەت. جاستار قوعامدىق جۇمىستارعا ءوز ەرىكتەرىمەن قاتىساتىن بولسا، جالپى پروبلەمالاردى شەشۋگە جانە ەلىمىزدىڭ گۇلدەنۋىنە ۇلەس قوسۋعا ۇمتىلادى، ال قوعام قۇندىلىقتار اينالاسىنا شوعىرلانىپ، بارلىق ادامداردىڭ پاراساتتىلىق پەن ادامگەرشىلىك تانىتۋىنا ىقپال ەتەدى، جاستارعا ادالدىقتى، ءوزارا كومەكتى، كەلىسىم مەن ءپاتريوتيزمدى دارىپتەيتىن بولادى»، – دەپ اتاپ ءوتتى اينۇر سابيتوۆا.