5-10 قاراشا ارالىعىندا ەلوردادا جۇمىس ىستەيتىن جاستاردان ساتىپ الۋ قۇقىعىنسىز جالدامالى پاتەر بويىنشا ءوتىنىش قابىلدانادى. جالدامالى پاتەرگە ءوتىنىمدى 29 جاسقا دەيىنگى جۇمىس ىستەيتىن جاستار بەرە الادى دەپ حابارلايدى Qamshy.kz اقپارات اگەنتتىگى ەلوردا اكىمدىگىنىڭ رەسمي سايتىنا سىلتەمە جاساپ. 

پاتەردىڭ اي سايىنعى تولەمى ءۇيدىڭ جالپى اۋدانىنىڭ كولەمىنە بايلانىستى 5 مىڭنان 15 مىڭ تەڭگە ارالىعىندا بولادى.

«ازاماتتارعا ىڭعايلى بولۋ ءۇشىن وسى باعدارلامانى ەلەكتروندى تۇردە جۇرگىزۋدى ءجون كوردىك. ءوتىنىم Smart Astana پورتالى ارقىلى ەلەكتروندى تۇردە قابىلدانادى. جالدامالى ۇيدەن ءۇمىتتى بولساڭىز Smart Astana پورتالىندا ەسق ارقىلى ونلاين رەجىمدە ءوتىنىش جىبەرە الاسىز. ءوتىنىش بەرگەننەن كەيىن ءبىز ونى وڭدەيمىز. وڭدەۋ ۋاقىتى بىرنەشە كۇندى الادى. وسىدان كەيىن ءوتىنىم بەرۋدەگى كەمشىلىكتەردى جويۋ ءۇشىن سىزگە ءبىر كۇن بەرەمىز. ەگەر ءسىز تىزىمدە ءبىر نارسەنى ۇمىت قالدىرساڭىز نەمەسە ناقتى مارتەبەڭىزدى، دەرەكتەردى ناقتىلاعىڭىز كەلسە، ءار ۇمىتكەرگە قۇجاتتاردى تولىقتىرۋعا ءبىر كۇن بەرەمىز. سونداي-اق ول دا ەلەكتروندى تارتىپتە جۇرگىزىلەدى»، – دەدى ەلوردا اكىمدىگىندە وتكەن بريفينگتە نۇر-سۇلتان قالاسى اكىمدىگىنىڭ تۇرعىن ءۇي قورىنىڭ ديرەكتورى نۇرسۇلۋ قوجاحمەتوۆا.

وتىنىمدەر قاراشانىڭ 5ء-سى مەن 10-ى ارالىعىندا قابىلدانادى. ىرىكتەۋدەن وتكەن جاستاردىڭ ءتىزىمى 2019 جىلدىڭ 10 جەلتوقسانىنان كەشىكتىرىلمەي جاريالانادى. سونداي-اق جالدامالى پاتەرگە ىلىككەن جاستار بيىل جىل سوڭىنا دەيىن قونىس تويىن تويلايتىن بولادى.

«ءار وتباسىنىڭ قۇرامى ءارتۇرلى، سوندىقتان مارتەبەسى دە ءارقالاي بولماق. كوپ بالالى بولساڭىز دا، ءۇش بولمەلى پاتەردىڭ بەرىلمەيتىنىن، تەك ءبىر جانە ەكى بولمەلىلەر تاراتىلاتىنى ەسكەرۋ كەرەك. تۇرعىن ءۇي ساتىپ الۋ، ۇزارتۋ قۇقىعىنسىز بەس جىلعا بەرىلەدى. ياعني بەس جىلدان كەيىن ءبىز سىزدەن وسى تۇرعىن ءۇيدى بوساتۋدى سۇراۋعا ءماجبۇر بولامىز، ويتكەنى ءبىز بۇل پاتەرلەردى باسقا جاستارعا بەرەمىز»، – دەپ قوستى تۇرعىن ءۇي قورىنىڭ ديرەكتورى.

بەلگىلى بولعانداي، جالعا بەرىلەتىن تۇرعىن ۇيلەر ش.ءۋاليحانوۆ-س.سەيفۋللين كوشەسىنىڭ قيىلىسىندا («استانالىق» بازارىنىڭ ماڭايى)، بوگەنباي باتىر مەن ءا.جانگەلدين كوشەلەرىنەن بەرىلەدى. ءبىر بولمەلى پاتەر اۋدانى 30-45 شارشى مەتر بولسا، ەكى بولمەلى 46-70 شارشى مەتر ارالىعىندا. ءبارى دە – جاڭا پاتەرلەر. «زاڭ بويىنشا ءبىز اياقتالماعان ءۇيدى بەرە المايمىز. جيھازدى جاستاردى وزدەرى ساتىپ الۋى كەرەك»، – دەدى ن.قوجاحمەتوۆا.

ال الماتى قالاسىندا «نۇرلى جەر» باعدارلاماسىنا وتىنىشتەر قابىلداۋ 30 قازاندا باستالدى، 12 قاراشاعا دەيىن جالعاسادى. سونىمەن قاتار جاستارعا ارنالعان باسپانا ەلوردانىڭ قاي اۋداندارىنان بەرىلەتىنى حابارلانعان بولاتىن. جاستارعا ارنالعان باسپانالاردىڭ كىلتى جىل سوڭىنا دەيىن بەرىلەتىن بولدى. مەملەكەتتىك تۇرعىن ۇيگە قالاي كەزەككە تۇرۋعا بولاتىنىن مىنا جەردەن كورۋگە بولادى.