اۆتوكولىك قۋاتى قوزعالتقىش كولەمىنە تاۋەلدى. قوزعالتقىش كولەمى ۇلكەندەر "جەلىستى" كەلەتىنى بەلگىلى. ءبىراق ونىڭ قۇنى دا ارزان ەمەس. سونداي-اق كولەمدى قوزعالتقىشتاردىڭ وتىن شىعىسى كوبىرەك، سالىعى جوعارىراق. Freedom Finance Insurance ساقتاندىرۋ كومپانياسىنىڭ ماماندارى زەرتتەۋ جۇرگىزىپ، قازاقستاندىقتار ءۇشىن قوزعالتقىشتىڭ قانداي كولەمى ۇنامدى ەكەنىن انىقتادى.

2019 جىلدىڭ تامىز ايىنداعى دەرەككە سايكەس قازاقستاندا 3 698 309 اۆتوكولىك تىركەلگەن. بۇل – وتكەن جىلمەن سالىستىرعاندا، 5،5 پايىزعا كەم. ەڭ كوپ كولىك سانى الماتى وبلىسىندا – 489 294. سانىنا قاراي ەكىنشى ورىندا الماتى (466 886)، ۇشتىكتە شىعىس قازاقستان وبلىسى (296 080) جايعاسقان.

قازاقستانداعى اۆتوكولىكتەردىڭ كوبىنىڭ (64،8%) شىعارىلعان مەرزىمى 10 جىلدان اسىپ كەتكەن. شىققانىنا 3 پەن 7 جىل بولعان ماشينالار ۇلەسى 15،7 پايىز. زاۋىتتان شىققانىنا 3 جىلدان اسپايتىن ماشينالار سانى ەلىمىزدە ودان دا از – 10،4%.

قازاقستاندىقتاردىڭ دەنى قوزعالتقىش كولەمى 1 500 – 2 000 تەكشە سم ماشينالاردى تاڭدايدى ەكەن. بۇنداي قوزعالتقىش كولەمدەگى اۆتوكولىكتەر سانى 1 711 633. بۇل – تىركەلگەن بارلىق ماشينالار سانىنىڭ جارتىسىن قۇرايدى (46،3%). تانىمالدىلىعى بويىنشا ەكىنشى ورىندا – قوزعالتقىش كولەمى 1100 – 1500 تەكشە سم. كولىكتەر ( 667 951، 18،1%). اتالعان قوزعالتقىش كولەمى بار اۆتوكولىكتەر "قالالىق" دەپ تانىلادى. سەبەبى، قالالىق جۇرگىزۋشىلەر ءۇشىن ماشينانىڭ قۋاتى ەمەس، وتىن پايدالانۋ شىعىسى ماڭىزدىراق.

تانىمالدىلىعى بويىنشا ءۇشىنشى ورىندا – قوزعالتقىش كولەمى 2 000 – 2 500 تەكشە سم. دەيىن اۆتوماشينالارى (16،7%). 

قوزعالتقىش كولەمىنىڭ ءۇش ءتۇرى: 3 000 – 4 000 تەكشە سم (3،3%)، 4 000 – 10 000 تەكشە سم (1،9%) جانە 1 100 تەكشە سم دەيىنگى (1،3%) كولىكتەر كوپ كەزدەسپەيدى.