بيىل كۇزگى اسكەرگە شاقىرتۋ ناۋقانىندا 1500-عا جۋىق جامبىلدىق جاس ەلىمىزدەگى اسكەري قۇرامالاردىڭ ساپىن تولىقتىرۋعا اتتانباق. وتان الدىنداعى مەرزىمدى اسكەري بورىشىن وتەۋگە ساپار شەككەن ساربازداردىڭ كەزەكتى ءبىر كومانداسى بۇرناعى كۇنى «ەل تىرەگى-2019» جاستار پاتريوتتىق اكسياسى اياسىندا تاراز قالاسىنداعى «جاستار اللەياسىندا» وتكەن شارادان سوڭ اقتاۋ قالاسىنداعى تەڭىز جاياۋ اسكەرىنىڭ اسكەري بولىمىنە اتتاندى، دەپ جازادى Qamshy.kz اقپارات اگەنتتىگى. 

سوندىقتان بۇل كۇنى اسكەرگە شىعارىپ سالۋ شاراسى ۇيىمداستىرىلعان «جاستار اللەياسىنا» 45 جاس ساربازدار اتا-انالارى مەن تۋعان-تۋىستارى، دوس-جاراندارى كوپتەپ جينالدى. ولاردىڭ الدىندا وبلىستىق قورعانىس ىستەرى جونىندەگى دەپارتامەنتنىڭ باسشىسى، پولكوۆنيك ەرلان جابىقبايەۆ ءسوز الىپ، جاس ساربازدارعا ساتتىلىك تىلەدى.

–قۇرمەتتى جاس ساربازدار! سىزدەر ساناۋلى ساتتەردەن كەيىن ۇلكەن ءومىر تابالدىرىعىن اتتايسىزدار. اسكەري قىزمەت وڭاي ەمەس. وتان الدىنداعى ازاماتتىق بورىشتارىڭدى وتەۋدە كەزدەسەتىن بارلىق قيىنشىلىقتاردى جاستىق جىگەردىڭ ارقاسىندا ابىرويمەن ەڭسەرەتىندەرىڭىز سەنەمىن.

سىزدەر قارۋلى كۇشتەردىڭ قۇرامىنداعى ارنايى اسكەري قۇرىلىم سانالاتىن تەڭىز جاياۋ اسكەرىنىڭ قاتارىن تولىقتىراسىزدار. بۇل اسكەري قۇراما ۇلى وتان سوعىسى جىلدارىندا جاۋعا تەڭىز ارقىلى شابۋىل جاساپ وتىرعان. ولاردىڭ اسكەري دايىندىعىنىڭ جوعارى بولعانى سونشالىق نەمىس باسقىنشىلارى كەڭەستىك تەڭىز جاياۋ اسكەرلەرىن «قارا ءولىم» دەپ اتاعان. ەندەشە جاس ساربازداردىڭ الدىندا وسى اسكەري ءبولىمنىڭ ابىرويىن ودان ءارى اسقاق ەتۋ مىندەتى تۇر،–دەدى ەرلان قاحاربەك ۇلى.

مۇنان جاس ساربازدارعا وبلىس اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا، قازاقستان رەسپۋبليكاسى قارۋلى كۇشتەرى ارداگەرلەر كەڭەسىنىڭ وبلىس بويىنشا ءتوراعاسى راميل تارتىقوۆ، «جاس سارباز» اسكەري-پاتريوتتىق قوزعالىسىنىڭ وبلىس بويىنشا ءتوراعاسى دۋلا ءابدىسامات ءسوز الىپ، جاس ساربازدارعا ىزگى تىلەكتەرىن ارنادى. شارانى «وڭتۇستىك»وڭىرلىك قولباسشىلىعى اسكەري باسقارماسىنىڭ اسكەري وركەسترىنىڭ سۇيەمەلدەۋىمەن انشىلەر ءوز ونەرلەرىن كورسەتتى. سونداي-اق ەرىكتىلەر جاس ساربازدارعا ارنايى دايىنداعان سىيلىقتارىن تابىس ەتتى.

جالپى قىركۇيەك ايىنان باستالعان مەرزىمدى اسكەري قىزمەتكە شاقىرۋ ناۋقانى وڭىردەگى ءوز دەڭگەيىندە ۇيىمداستىرىلۋدا. بۇعان دەيىن جامبىلدىق جاس ساربازدار ەلىمىزدىڭ سولتۇستىك، شىعىس، باتىس وڭىرلەرىندەگى ۇلتتىق قاۋىپسىزدىك كوميتەتى شەكارا قىزمەتىنىڭ، ۇلتتىق ۇلاننىڭ اسكەري بولىمدەرى مەن بىرگە مەملەكەتتىك كۇزەت قىزمەتىنىڭ ساپىن تولىقتىردى. ەلىمىزدەگى قورعانىس ىستەرى سالاسىندا جۇرگىزىلىپ جاتقان قايتا جاڭعىرۋ جۇمىستارىنا ساي مەرزىمدى اسكەري قىزمەتكە شاقىرۋ ناۋقانىندا ەڭ اۋەلى جوعارى ءبىلىمدى جاستارعا باسىمدىق بەرىلىپ جاتىر.