سەمەيدە فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ ينفورماتيكا ءپانى ءمۇعالىمى باقىتبەك ورىنبايەۆ پەن وقۋشىلار ميراس مۇراتقانوۆ، نۇربول ماقتايەۆ دومبىرادا ويناي الاتىن روبوت قۇراستىردى – دەپ Qamshy.kz اقپارات اگەنتتىگى حابارلايدى، مەكتەپتىڭ باسپا ءسوز قىزمەتىنە سىلتەمە جاساپ.

ونەرتاپقىشتار بۇل ەڭبەكتەرىن ابايدىڭ 175 جىلدىعىنا ارنادى.

"ءار وقۋ جىلى باستالاردا الدىمىزعا ماقسات قويامىن. ورتاق ويىمىز جاڭا ءبىر تۋىندىنى جاساپ، قۇراستىرۋ ارقىلى مەكتەپ وقۋشىلارىن شىعارماشىلىققا ەلىتۋ، ولاردىڭ قىزىعۋشىلىعىن ارتتىرۋ. روبوتقا دومبىرامەن كۇي تارتتىرۋ يدەياسى ءبىراز ۋاقىت ويدا ءجۇردى. ءساتى وسى ۋاقىتتا ءتۇسىپ وتىرعان جوبانى جۇزەگە اسىرۋعا تولىق 1 اي ۋاقىت جۇمسادىق. الدىمەن روبوتتى قۇراستىرىپ، سودان-سوڭ ولاردىڭ پەرنەنى باسۋشى، ىشەكتى قاعۋشى سياقتى ءاربىر بولىكتەرىن جەكە-جەكە جاسادىق"، – دەيدى زياتكەرلىك مەكتەپ ءمۇعالىمى، جوبا جەتەكشىسى باقىتبەك نۇرلىبەك ۇلى.

روبوتتى قۇراستىرۋشىلاردىڭ سوزىنشە، بۇعان دەيىن ۇقساي روباتتار قۇراستىرعان. ءبىراق، ول ءبىر كۇيدى ورىنداۋمەن عانا شەكتەلگەن. ال، جاڭا قۇرىلعى دومبىراداعى بارلىق پەرنەنى ەركىن باسىپ، ىشەكتى قالاۋىنشا قاعا الۋ ارتىقشىلىعىنا يە.

سونداي-اق كۇيدى ورىنداۋدا قاتەلىكتەر بولسا، وندا پروپورسيونالدى ديففەرەنسيالداۋشى رەتتەگىش ارقىلى ءوزى ەسەپتەپ، رەتتەپ وتىرادى.

روبوت دومبىرادا كۇيدى كومپيۋتەرگە ەنگىزىلگەن نوتالار ارقىلى ورىندايدى. قۇراستىرۋشىلار كۇيدىڭ ورىندالۋ جىلدامدىعىن دا قالاۋىنشا وزگەرتۋلەرىنە قول جەتكىزگەن.  

قازىرگى تاڭدا جوبا ا.قۇنانباي ۇلىنىڭ "تورجورعا"، حالىق كۇيى "قارا جورعا" مەن حالىق ءانى "ەركەم-اي" -دى ورىنداي الادى.

ۇستاز بەن شاكىرتتەر ءوز تۋىندىلارىنىڭ كەز كەلگەن شىعارمانى نوتا ارقىلى ورىنداۋعا بولاتىنىن ءمالىم ەتتى.