تاراز قالاسىنداعى №5 «قاراسۋ» ىقشاماۋدانىندا كوپ بالالى جانە الەۋمەتتىك از قامتىلعان وتباسىلارعا ارنالعان ۋاقىتشا تۇرعىن ۇيلەر سالۋ جوباسى اياسىندا 4 كوپقاباتتى تۇرعىن ءۇي سالىنىپ جاتىر. قارقىندى قۇرىلىس جۇمىستارى جەلتوقسان ايىندا اياقتالىپ، جوعارىدا اتالعان ساناتقا جاتاتىن 180 تارازدىق وتباسى جاڭا جىلدى جانعا جايلى جاڭا پاتەردە قارسى الاتىن بولادى، دەپ جازادى Qamshy.kz اقپارات اگەنتتىگى. 

وبلىس اكىمىنىڭ باستاماسىمەن قولعا الىنعان بۇل جوباعا الەۋمەتتىك جاعدايى تومەن، كوپ بالالى وتباسىلار قارجىلىق احۋالى تۇزەلىپ، ءوز پاتەرلەرىنە قاجەتتى العاشقى جارنانى جيناعانعا دەيىن وسىناۋ ۋاقىتشا باسپانامەن قامتاماسىز ەتىلەدى.

تاراز قالاسىنداعى №5 «قاراسۋ» ىقشاماۋدانىندا سالىنىپ جاتقان نىساندى «الەۋمەتتىك جاتاقحانا» اتاعا كەتكەنىمەن ونداعى تۇرعىندارعا جاسالعان جاعداي قاراپايىم كوپقاباتتى ۇيلەردەن كەم ەمەس. ءاربىر پاتەردىڭ جەكە ءاسۇي، جۋىنۋعا ارنالعان بولمەسى جانە دارەتحاناسى بار. بۇگىندە الىپ قۇرىلىس الاڭىنا اينالعان 4 كوپ قاباتتى تۇرعىن ءۇيدىڭ ءارقايسىسىندا 2 بولمەلى 45 پاتەر ورنالاسقان. سايكەسىنشە جىل سوڭىنا قاراي مۇندا تۇرمىستىڭ تاۋقىمەتىن سەزىنىپ، باسپانالى بولۋدى كوپتەن ارمان ەتكەن 180 تارازدىق وتباسى قونىس تويىن تويلاماق. نىسان قۇرىلىسىنا جاۋاپتى «بينوم» جاۋاپكەرشىلىگى شەكتەۋلى سەرىكتەستىگىنىڭ اتقارۋشى ديرەكتورى قۋات باققارايەۆ تۇرعىن ۇيلەردىڭ جىل سوڭىندا تولىعىمەن پايدالانۋعا بەرىلەتىنىن ايتادى.

–ءبىز قۇرىلىس جۇمىستارىن قىركۇيەك ايىنىڭ ورتاسىنان باستادىق. ءقازىر نىساننىڭ بارلىق 4 بلوگىنداعى قۇرىلىس جۇمىستارى 60 پايىزعا اياقتالدى. قۇرىلىسشىلار تۇرعىن ۇيلەردىڭ شاتىرىن جابۋ، سىرتقى قاسبەتىن جانە ىشكى ارلەۋ جۇمىستارىمەن اينالىسىپ جاتىر.

5 قاباتتان تۇراتىن 4 تۇرعىن ۇيدە 180 پاتەر بار. ولاردىڭ بارلىعىن كولەمى 53،2-56،63 شارشى مەتر بولاتىن 2 بولمەلى پاتەرلەر قۇرايدى.

بۇگىندە نىساندا 160 قۇرىلىسشى ەڭبەك ەتىپ جاتىر. جۇمىس كولەمىنىڭ اۋقىمدىلىعىنا بايلانىستى بىر-ەكى جۇماكولەمىندە ولاردىڭ قاتارىن تاعى 45-50 قۇرىلىسشى تولىقتىرماق.

تۇرعىن ۇيلەردى جاڭا جىلعا قاراي پايدالانۋعا بەرۋگە الەۋەتىمىز تولىقتاي جەتەدى. ءبىر سوزبەن ايتقاندا الەۋمەتتىك جاعدايى تومەن، كوپ بالالى 180 تارازدىق وتباسى مەرەكەنى جاڭا پاتەردە قارسى الاتىن بولادى،–دەيدى ق.باققارايەۆ.

بۇگىنگى تاڭدا وبلىس اۋماعىندا 612 پاتەرلى 12 جاتاقحانانىڭ قۇرىلىسى جۇرگىزىلىپ جاتىر. مۇنداعى 478 پاتەرلى 9 جاتاقحانا جىل سوڭىنا دەيىن پايدالانۋعا بەرىلەدى.