سارىسۋ اۋدانىندا وبلىس ەكونوميكاسىنىڭ وزەگى سانالاتىن ىرگەلى ءوندىرىس وشاقتارى ورنالاسقان. قاراتاۋدىڭ يەن بايلىعىن يگەرۋدى ماقسات ەتكەن «ەۋروحيم»، «قازفوسفات» جاۋاپكەرشىلىگى شەكتەۋلى سەرىكتەستىكتەرىنىڭ ءبىرقاتار ونەركاسىپ نىساندارى ورنالاسقان ايماقتا جۇمىسپەن قامتۋ ماسەلەسى دە كەزەڭ-كەزەڭىمەن شەشىلىپ وتىر. بۇل ورايدا ناتيجەلى جۇمىسپەن قامتۋدىڭ مەملەكەتتىك باعدارلامالارىن سارىسۋلىقتاردىڭ ايقىن سەزىنىپ جاتقانىن اتاپ وتكەن ءجون، دەپ جازادى Qamshy.kz اقپارات اگەنتتىگى. 

جالپى جىل باسىنان بەرى سارىسۋ اۋداندىق جۇمىسپەن قامتۋ ورتالىعىنا «ەكى قولعا ءبىر كۇرەك تابۋ» ماسەلەسىمەن قايىرىلعان 1 784 ادامنىڭ 755ء-ى تۇراقتى جۇمىس ورنىن تاپقان. جۇمىسسىزدىق ماسەلەسى الاڭداتقانداردىڭ 1 115ء-ى اۋىل تۇرعىنى ەكەن. اۋىلدا جۇمىسسىزدىقتان الەۋمەتتىك قورعاۋ شارالارىنا 1 851 ادام تارتىلدى.

ءوز كەزەگىندە جۇمىسسىزدىقپەن كۇرەستە ازاماتتاردى اقىلى قوعامدىق جۇمىس ورنىن ۇسىنۋ تاجىريبەسى دە ءوز ناتيجەسىنەن بەرۋدە. جىل باسىنان بەرگى 9 ايدا 398 ادام اقىلى قوعامدىق جۇمىسپەن قامتىلىپ، ولاردىڭ ءارقايسىسىنا 91 401 تەڭگە ەڭبەكاقى تۇراقتى تولەنىپ تۇردى.

جاستار جۇمىسسىزدىعىنداعى تابىستى قادام «جاستار تاجىريبەسى» باعدارلاماسى اياسىندا سەزىلۋدە. جىل باسىنان بەرى بۇل باعدارلامانىڭ شاراپاتىن كورۋدەن ءۇمىتتى 158 سارىسۋلىق جاس مامان 6 ايلىق جۇمىس ورنىمەن قامتاماسىز ەتىلدى. مەملەكەت تاراپىنان ولاردىڭ قىزمەت ورنىنا قاراماستان ءارقايسىسىنا 47 219 تەڭگەدەن ايلىق تولەنىپ ءتۇردى.

الەۋمەتتىك جۇمىس ورىندارى ارقىلى قاڭتار ايىنان بەرى 144 جۇمىسسىز ۋاقىتشا جۇمىسقا ورنالاستى. ءوز كەزەگىندە ءدال وسى ماقساتقا مەملەكەت تاراپىنان بولىنگەن قاراجات تولىقتاي يگەرىلدى. جۇمىسشى ءارى ەڭبەك نارىعىنداعى قاجەتتى ماماندىقتار بويىنشا ەسەپتى مەرزىم ىشىندە قىسقا مەرزىمدىك كاسىپتىك وقىتۋدان 200 ادام جولداۋ جوسپارلانعان. سايكەسىنشە بۇل جوسپار ارتىعىمەن ورىندالىپ 233 ادام كاسىپتىك وقىتۋمەن قامتىلدى. وسىلايشا كاسىپتىك وقىتۋ شارالارىنا قارالعان 22 ميلليون 900 مىڭ تەڭگە قارجى تولىق يگەرىلدى. بۇگىنگى كۇنگە دەيىن 4 ماماندىق بويىنشا 70 ازامات وقۋىن اياقتاپ، ءتيىستى قۇجاتتارىنا يەلىك ەتتى. ال قالعان 130 ادام ءوز ماماندىقتارى بويىنشا بىلىمدەرىن جەتىلدىرىپ جاتىر.

جۇمىسپەن قامتۋ شارالارىنىڭ نەگىزىگى ءبىر باعىتى كاسىپ اشۋعا نيەتتى ازاماتتاردى قولداۋ دەسەك، توعىز اي ىشىندە 50 سارىسۋلىق شاعىن نەسيە الىپ، شارۋاسىنا دوڭگەلەتۋدىڭ العى شارتىن جاسادى. جۇمىسسىزدارعا كاسىپكەرلىك نەگىزدەرىن وقىتۋعا باعىتتالعان «باستاۋ بيزنەس» جوباسىمەن 195 ادام وقىتىلدى. ءبىر سوزبەن ايتقاندا سارىسۋ اۋدانىندا جۇمىسپەن قامتۋدىڭ ءتۇرلى شارالارى ناتيجەسىندە 755 ادام تۇراقتى جۇمىسقا ورنالاستى.