تۇتاس الەم سيفرلاندىرۋدىڭ سيقىرىنا ەرگەن زاماندا قازاقستاندىق مەكتەپتەرگە زامان كوشىنەن قالماي، باسەكەگە قابىلەتتى ءبىلىمدى ۇرپاق تاربيەلەۋ ءۇشىن ءبىلىم بەرۋ ۇيىمدارىن سيرفلاندىرۋ وتە وزەكتى ماسەلە سانالادى. «سيفرلىق قازاقستان» مەملەكەتتىك باعدارلاماسى اياسىندا جۇزەگە اسىپ جاتقان ءبىلىم بەرۋ ۇيىمدارىن سيفرلاندىرۋ ءىسى مەركى اۋدانىندا دا جۇيەلى جۇرگىزىلۋدە. بۇگىندە اۋدانداعى 36 مەكتەپتىڭ بارلىعى دا ينتەرنەت جەلىسىنە قوسىلعان، دەپ جازادى Qamshy.kz اقپارات اگەنتتىگى. 

مەركى اۋدانىنداعى مەكتەپتىڭ 47 پايىزى سىم جەلىلەرى بويىنشا كەڭ جولاقتى ينتەرنەتكە قوسىلسا، قالعان 53 پايىزى wi-fi جەلىسىمەن 4-10 مەگوبيت/سەك-تەن جوعارى جىلدامدىق عالامتورعا قوسىلادى. كەڭ جولاقتى ينتەرنەتپەن قامتىلۋ ناتيجەسىندە 36 مەكتەپتە «كۇندەلىك» جوباسىمەن جۇمىس جاساۋدا ەشقانداي ماسەلە تۋىندامايدى. سول سەكىلدى اۋدان مەكتەپتەرىنىڭ بارلىعى دا «Bilimland» سيفرلىق ءبىلىم بەرۋ رەسۋرستارى پورتالىمەن قامتاماسىز ەتىلگەن.

بۇگىندە اۋداندار 4 IT سىنىبى جۇمىس جاسايدى. ونىڭ العاشقىسى 2018 جىلى اشىلعان بولسا قالعان ۇشەۋى ينديكاتورلىق كورسەتكىشتەرگە ساي اعىمداعى جىلى ىسكە قوسىلعان. مۇنان بولەك 20 مەكتەپ روبوتوتەحنيكا كابينەتتەرىمەن جابدىقتالعان. سونداي-اق اۋدانداعى بارلىق مەكتەپكە wi-fi جەلىسى تارتىلعان. ايماقتاعى ءبىلىم وشاقتارىنداعى 641 وقۋ كابينەتىنىڭ 557ء-سى كومپيۋتەرمەن قامتاماسىز ەتىلگەن. قازىرگى تاڭدا ايماقتاعى بالاباقشاعا بالالاردى كەزەككە قويۋ جانە جولداما الۋ اقپاراتتىق جۇيەسى edugarden.kz سايتى ارقىلى جۇزەگە اسىرىلىپ جاتىر. بۇل جۇيە اۋدانداعى 37 مەكتەپكە دەيىنگى ءبىلىم بەرۋ ۇيىمىنىڭ بارلىعىنا ەنگىزىلگەن. سونىمەن قاتار اۋدانداعى بارلىق مەكتەپتەردە وقۋشىلاردى 1 سىنىپقا قابىلداۋ eduschool.kz سايتىندا قولعا الىنعان. سايكەسىنشە بۇل جوبا ارقىلى اتا-انالار ۇيىنەن شىقپاي-اق بالالارىنان بالاباقشا كەزەگىنە قويىپ، مەكتەپكە قابىلداۋعا قاجەتتى قۇجاتتارىن ەلەكتروندى رەجيمدە تىركەي الادى. ءوز كەزەگىندە پەداگوگتاردى جۇمىسقا قابىلداۋدى باسقارۋ جانە بوس جۇمىس ورىندارى كەزەگى jumys.sitsen.kz اقپاراتتىق جۇيەسى اۆتوماتتاندىرىلدى.

جاڭا وقۋ جىلىندا مەكتەپتەردىڭ كومپيۋتەرمەن ۇلەسىن ارتتىرۋ ماقساتىندا 73 كومپلەكت كومپيۋتەر الۋ جوسپارلانعان. سونداي-اق، حيميا، فيزيكا، بيولوگيا پاندەرىنە ارنالعان 3 جاڭا موديفيكاسيالى كابينەت الىندى. بۇل ماقساتتا وبلىستىق بيۋدجەتتەن 22 ميلليون 743 مىڭ تەڭگە قارجى قارالدى. مەكتەپتەرگە قاجەتتى 170 كومپلەكت ينتەراكتيۆتى قۇرال جابدىقتار دا الۋ جوسپارلانىپ وتىر.