الماتى اكىمى باقىتجان ساعىنتايەۆ مەديسينانىڭ بولاشاق پەرسپەكتيۆالارى تالقىلانعان IV حالىقارالىق «دەنساۋلىق ساقتاۋداعى يننوۆاسيا – 2019» عىلىمي فورۋمىنا قاتىستى، دەپ جازادى اكىمدىكتىڭ رەسمي سايتى.

فورۋم پرەزيدەنتتىڭ ءىسباسقارماسى مەديسينالىق قىزمەتىنىڭ 90 جىلدىعى اياسىندا وتۋدە. بۇل كۇن پرەزيدەنتتىڭ ءىسباسقارماسى ورتالىق كلينيكالىق اۋرۋحاناسىنىڭ الماتىدا 1929 جىلى ەمحانا تۇرىندە اشىلۋىنان باستاۋ الادى.

«بۇگىنگى كۇنى ول زاماناۋي مەديسينالىق ورتالىق، مۇندا وتاندىق مەديسينانى دامىتۋشى جانە وزىق ەمدەۋ-دياگنوستيكالىق پراكتيكانى ەنگىزۋشى ۇزدىك دارىگەرلەر-جاڭاشىلدار قىزمەت ەتەدى»، – دەپ اتاپ ءوتتى ب. ساعىنتايەۆ.

قالا اكىمى «سوۆمينكا» رەتىندە تانىلعان وكا تاجىريبەسىنىڭ مەديسينالىق قىزمەتتىڭ ساپاسىن جوسپارلى تۇردە ارتتىرۋ ماقساتىندا الماتىنىڭ بارلىق مەدمەكەمەلەرىنە تاراتىلاتىنىن اتاپ ءوتتى.

«دارىگەرلەردىڭ كاسىبي بىلىكتىلىك دەڭگەيى تۇراقتى ارتاتىن بولادى، ولاردىڭ دۇرىس جۇمىس جاساۋى ءۇشىن ءبىز بارلىق جاعدايلاردى جاسايمىز. ايتا كەتەرلىگى،تاياۋداعى ءۇش جىل ىشىندە اۋرۋحانالار مەن ەمحانالاردىڭ جابدىقتالۋ دەڭگەيىن 90%-عا دەيىن جەتكىزەمىز»، – دەدى مەگاپوليس اكىمى..

بولاشاق مەديسيناسىنىڭ پەرسپەكتيۆالارى تالقىلانعان فورۋم جۇمىسى ەكى كۇنگە سوزىلادى.