«باقىتتى وتباسى» ەل قازىناسى. شىندىعىندا شاڭىراقتا شاتتىق بولسا، ەلدە دە تىنىشتىق بولاتىنى انىق. ال ەل تۇرعىندارىنىڭ باستى ماسەلەسى ول باسپانا جايى. سول سەبەپتى ەلىمىز «باقىتتى وتباسى» باعدارلاماسىن جانداندىردى. باعدارلاما اياسىندا بۇگىندە جامبىل وبلىسىندا قونىستويىن تويلاپ جاتقاندار از ەمەس، دەپ جازادى Qamshy.kz اقپارات اگەنتتىگى. 

جالپى تۇرمىسى تومەن كوپبالالى وتباسىلاردى قولداۋدىڭ «باقىتتى وتباسى» كەشەندى باعدارلاماسى بويىنشا تۇرعىندارعا 10 پايىز باستاپقى جارنا، 2 پايىز جىلدىق ۇستەماقىمەن 19 جىلعا ءبولىپ تولەۋ مۇمكىندىگى ۇسىنىلدى. باعدارلاما «قازاقستاننىڭ تۇرعىن ءۇي قۇرىلىس جيناق بانكى» اق ارقىلى جۇزەگە اسىرىلۋدا. وعان مەملەكەتتىك قوردان پاتەر الۋعا تىركەلگەن «تولىق ەمەس وتباسى»، «كوپبالالى وتباسى»، «مۇگەدەك بالا اسىراۋشى وتباسى» ساناتتارىنداعى ازاماتتار قاتىسا الادى. قازىرگى ۋاقىتتا قالا بويىنشا 941 جولداما بەرىلدى. ونىڭ ىشىندە 351 ازاماتتىڭ قۇجاتتارى بانككە قابىلدانىپ، 319 ادامنىڭ تولەم قابىلەتى راستالدى. سونىمەن قاتار اعىمداعى جىلدىڭ تامىز ايىنان باستاپ قالا اۋماعىنان كوپبالالى وتباسىلارعا جەكەشەلەندىرۋ قۇقىعىنسىز 142 پاتەر ساتىپ الىنۋدا. بۇدان بولەك، «قاراسۋ» شاعىن اۋدانىندا وبلىس اكىمىنىڭ تاپسىرماسى بويىنشا ءتورت جاتاقحانا سوعىلىپ، كەزەكتە تۇرعان كوپبالالى وتباسىلارعا زاڭ اياسىندا ۇلەستىرىلەدى.

جەكە تۇرعىن ۇيلەر قۇرىلىسىنا كەلسەك، سۇلەيمەنوۆ كوشەسىنەن ينۆەستورلار تاراپىنان نەسيەگە بەرىلەتىن ءبىرىڭعاي ساۋلەتتىك ستيلدەگى كوتتەدجدىك ۇيلەردىڭ قۇرىلىستارىن جۇرگىزۋ ءۇشىن جەر تەلىمدەرى بەلگىلەنگەن. وسىنىڭ نەگىزىندە «كسس Construction»، «رەمستروي-سس»، «سىرىم بىلەكە»، «دامدەس» مەردىگەر كومپانيالارى كەلىسىمشارت جاساستى. قازىرگى تاڭدا 14 ءۇيدىڭ قۇرىلىسى اياقتالىپ، 4 ۇيگە الەۋەتتى ساتىپ الۋشى انىقتالدى. بۇدان بولەك، قوسىمشا 26 ءۇيدىڭ قۇرىلىسى جۇرگىزىلۋدە. وسى ۇيلەرگە حالىقتى قونىستاندىرۋ ماقساتىندا 2006 جىلى جەر ۋچاسكەسىن الۋعا كەزەكتە تۇرعان ازاماتتارعا ءتۇسىندىرۋ جۇمىستارى جۇرگىزىلدى.

تۇرعىن ءۇي جايلى ايتقاندا، جەر كەزەگىندە تۇرعان ازاماتتاردى ەسكەرمەۋ مۇمكىن ەمەس. سەبەبى جەكە تۇرعىن ءۇي قۇرىلىسىن جۇرگىزۋ ءۇشىن جەر تەلىمدەرىن الۋعا 71 493 ازامات كەزەكتە تۇر. ولارعا اسقاروۆ كوشەسىنەن جانە «حامۋكات»، «قاراساي»، «قۇمشاعال»، «شالعاي قاراسۋ» القاپتارىنداعى 932،6 گەكتار جەر قاراستىرىلعان. ناتيجەسىندە كەزەكتە تۇرعان 3 752 ازاماتتى جەرمەن قامتۋ جوسپارلانۋدا. بۇدان بولەك، 2012 جىلدان بەرى «كولتوعان» القابى ماڭىنداعى 250 گەكتار الاڭدا بولىنگەن 1 232 جەر تەلىمى قارالىپ، ناتيجەسىندە پايدالانۋ مەرزىمى وتكەن 127 جەر ۋچاسكەسى مەملەكەت مەنشىگىنە قايتارىلدى. بوس جاتقان جەرلەر كەزەكتە تۇرعان ازاماتتارعا قايتا بەرىلەتىن بولادى. ءيا تۇرعىن ءۇي، جەر ماسەلەسى جوسپارعا ساي ورىندالسا، حالىقتىڭ كوپتەن بەرى قاۋزاپ جۇرگەن سۇراقتارى سەيىلەر ەدى. باستىسى، قۇرىلىس جۇمىستارىندا جۇيە بار، تەك مەملەكەت پەن مەردىگەرلەر باستاعان ءىستى اياقسىز قالدىرماسا يگى.