بۇگىندە ءبىلىم سالاسىنا باعىتتالعان سالالىق باعدارلامالار از ەمەس. ولاردىڭ دەنى ءبىلىم جۇيەسىن جەتىلدىرىپ عانا قويماي، ۇلت تاربيەسى مەن ۇرپاق كەلەشەگىنە باعىتتالعان. مىنە سونداي بۇگىنگى بۋىن تاربيەسىن تەرەڭنەن قاۋزاعان، ءارى ەلباسىنىڭ «رۋحاني جاڭعىرۋ» باعدارلاماسىمەن ۇشتاسقان شارالاردىڭ ءبىرى تاراز قالاسىنداعى «ءبىلىم» كوللەدجىندە ۇيىمداستىرىلدى، دەپ جازادى Qamshy.kz اقپارات اگەنتتىگى. 

«قوعامدىق كەلىسىم» مەكەمەسىندە وتكەن باسقوسۋعا جامبىل وبلىسى اكىمدىگىنىڭ ءبىلىم باسقارماسى باسشىسىنىڭ ورىنباسارى تالعات جامالوۆ، «ءۇش بايلىق» قوعامدىق بىرلەستىگىنىڭ باسشىسى ورازكۇل اسانعازى قىزى قاتىسىپ، ورامدى ويلارىن ورتاعا سالدى. قوعام قايراتكەرى ۇلتتىق كود پەن تەكتىلىك جونىندە اڭگىمەسىن ءوربىتىپ، قىز تاربيەسىندەگى باستى قۇندىلىقتارعا كەڭىنەن توقتالدى. – ەلباسى: «مەن قازاقستاندىقتاردىڭ ەشقاشان بۇلجىمايتىن ەكى ەرەجەنى ءتۇسىنىپ، بايىبىنا بارعانىن قالايمىن. ءبىرىنشىسى – ۇلتتىق كود، ۇلتتىق مادەنيەت ساقتالماسا، ەشقانداي جاڭعىرۋ بولمايدى. ەكىنشىسى – العا باسۋ ءۇشىن ۇلتتىڭ دامۋىنا كەدەرگى بولاتىن وتكەننىڭ كەرتارتپا تۇستارىنان باس تارتۋ كەرەك»، – دەپ اتاپ وتكەن بولاتىن. قازىرگى تاڭدا كەيبىر بويجەتكەندەرىمىز كەشكى ۋاقىتتا كوشەدە ءجۇرۋدى سانگە اينالدىرىپ بارا ما، قالاي ءوزى؟ قىدىرماسىن دەمەيمىز، ارينە. قىدىرسىن. دەگەنمەن كوشەدە كەشكىلىك ۋاقىتتا سەرۋەن قۇرعاندى ازايتۋ كەرەك. سونىڭ سالدارىنان قىزدارىمىز اششى سۋدىڭ ارباۋىنا ءتۇسىپ، شىلىم شەگىپ، تۇنگى كلۋبتاردىڭ ەسىگىن باققانىن كورگەندە جۇرەگىڭ اۋىرادى. ءاسىلى، كەشكىلىك كوشەدە جۇرگەندەردىڭ وڭعانىن كورگەنىمىز جوق. وسىنداي جەڭىل مىنەزدىڭ سالدارىنان جۇكتى بولىپ، تاستاندى بالالاردىڭ كوبەيىپ جاتقانى دا الاڭداتادى. وسىنىڭ ءبارى دە ءوزىمىزدىڭ قاراكوز قىزدارىمىز، ەلدىڭ ەرتەڭگى بولاشاق انالارى ەمەس پە؟! ويلانايىقشى، ولاردىڭ ەرتەڭگى تاعدىرى نە بولادى؟ بۇلاردان ونەگەلى ۇرپاق كۇتۋگە بولا ما؟ الماعايىپ زاماندا ءبىز ارىمىز بەن ۇياتىمىزدى جوعارى قويۋىمىز كەرەك. اق بوساعانى اتتاپ، نەكەڭدى قيدىرىپ، اتا-اناڭنىڭ رازىلىعىن الىپ، بەتى اشىلىپ جار بولعان قىزدىڭ قاي ورتادا بولسىن ابىرويى بيىك بولادى. سان ءتۇرلى سيقىرعا الدانىپ، جىگىتتەردىڭ جەتەگىنەن ۇستاماۋ كەرەك. سوندىقتان وتباسىندا اكەنىڭ تاربيەسى بولۋى كەرەك. اكەسىنە ەركەلەپ، ونى سىيلاپ وسكەن بويجەتكەن جات جۇرىسكە جول بەرمەيدى، – دەدى ورازكۇل اسانعازى قىزى. اشىق، ەركىن فورماتتا وتكەن كەزدەسۋدە ستۋدەنتتەر ورازكۇل اسانعازىقىزىنا كوكەيدەگى ساۋالدارىن قويدى.