سەمەيدىڭ مەديسينا ۋنيۆەرسيتەتىندە شقو تىلدەردى دامىتۋ جونىندەگى باسقارماسىنىڭ ۇيىمداستىرۋىمەن "ءۇش بايتەرەك: تاعدىر مەن تاعىلىم" تاقىرىبىندا وبلىستىق عىلىمي-تاجىريبەلىك كونفەرەنسياسى ءوتتى.

شارا الاش قايراتكەرلەرى س. سەيفۋللين،  ءى. جانسۇگىروۆ جانە ب. ءمايليننىڭ 125 جىلدىعىنا ارنالدى. ماقساتى - قازاقتىڭ "ءۇش بايتەرەگى" اتانعان قايراتكەرلەردىڭ تاعىلىمىن، قازاق ادەبيەتىن دامىتۋداعى ەڭبەكتەرىنىڭ ەرەكشەلىگىن كوپشىلىككە تانىتۋ جانە لاتىننەگىزدى جاڭا ءالىپبيدىڭ ماڭىزىن ءتۇسىندىرۋ. كونفەرەنسياعا عالىمدار، زيالى قاۋىم وكىلدەرى، مەملەكەتتىك ورگاندار مەن مەكەمەلەر قىزمەتكەرلەرى، ستۋدەنت جاستار،  قوعامدىق ۇيىمدار قاتىستى. شارا بارىسىندا قازاق ادەبيەتىندەگى الاش يدەياسى، ءۇش بايتەرەكتىڭ تۇلعا رەتىندە قالىپتاسۋى جانە شىعارمالارىنىڭ ادەبي-تەوريالىق نەگىزدەرى تالقىلانىپ، ۇسىنىستار ۇسىنىلدى.

- قازاق ادەبيەتىنىڭ "ءۇش بايتەرەگىنە" اينالعان ءىلياس، بەيىمبەت، ساكەننىڭ ەڭبەكتەرىن كۇللى قازاق حالقى جاقسى بىلەدى. ولار قيىن دا قيلى زاماندا جازۋشىلىقتى جاندارىنا سەرىك ەتىپ، قوعام قايراتكەرىنە اينالا بىلگەن تۇلعالار. سونىمەن قاتار، بيىل "ەگەمەن قازاقستان" گازەتى 100 جىلدىق مەرەيتويىن اتاپ ءوتتى. ال، وسى "ءۇش بايتەرەگىمىزدىڭ" بۇل گازەتپەن ءومىر جولدارى تىعىز بايلانىستى. سول ۋاقىتتاعى "ۇشقىن"، "ەڭبەك تۋى"، "ەڭبەكشى قازاق"،" سوسياليستىك قازاقستان" گازەتتەرى بولىپ، حالىقتىڭ جاعدايىن جەتكىزە بىلگەن گازەت، بۇگىنگى كۇنى "ەگەمەن قازاقستان"  بولىپ جۇمىسىن جالعاستىرۋدا. ساكەن مەن بەيىمبەت بۇل گازەتتىڭ العاشقى رەداكتورلارىنىڭ ءبىرى بولعان ەدى. ءۇش بايتەرەگىمىز دە ەڭبەك جولدارىن وسى گازەتتەن باستاعانى دا بارشامىزعا بەلگىلى.سول سەبەپتى وتكەن مەن بۇگىنگىنى ۇشتاستىرا وتىرىپ كونفەرەنسيا وتكىزىلۋدە، - دەدى شقو تىلدەردى دامىتۋ جونىندەگى باسقارما باسشىسىنىڭ مىندەتىن اتقارۋشى تولەمىسوۆا روزا ءاشىمحان قىزى.