جۋالى اۋدانىنداعى قاراباستاۋ اۋىلىندا سامبو كۇرەسىنەن سپورت شەبەرى، ۇزاق جىلدار بويى اۋىل جاستارى اراسىندا سپورتتىڭ كوپتەگەن ءتۇرىن ناسيحاتتاپ، ۇيىرمەلەر اشا وتىرىپ، اۋدان، وبلىس، رەسپۋبليكا كولەمىندە چەمپيوندار دايىنداپ، بۇگىندە جەرلەستەرىنىڭ جۇرەگىندە ماڭگىلىككە ساقتالعان بەكبەردى ەركەباي ۇلى قاشكەيەۆتى ەسكە الىپ، ونىڭ ەسىمىنىڭ قۇرمەتىنە دزيۋدو كۇرەسىنەن 2003-2004 جىلى تۋعان جاسوسپىرىمدەر اراسىندا وبلىستىق تۋرنير وتكىزىلدى.

جيىننىڭ العاشقى قۇتتىقتاۋ ءسوز اۋدان اكىمى نارباي ەرگەبەكوۆكە بەرىلدى. ءوز سوزىندە نارباي ءابىلقاسىم ۇلى اۋداننىڭ سپورت سالاسىنداعى جەتىستىكتەرى مەن اۋداننان شىققان چەمپيونداردىڭ ەسىمدەرىن دە اتاپ كەتتى.

سونان سوڭ اۋىلدىق مادەنيەت ۇيىندە دزيۋدو كۇرەسىنەن جارىس ءوتتى. سايىسقا تاراز قالاسىنان، جامبىل، سارىسۋ، بايزاق،تالاس، جۋالى اۋداندارىنىڭ سپورتشىلارى قاتىستى.

جارىس دزيۋدونىڭ جەتى سالماق تۇرىنەن ءوتتى. تۋرنيرگە قاتىسۋشىلار 2003-2004 جىلى تۋىلعان 46، 50، 55، 60، 66، 73 جانە 81 كيلوگرامم سالماق دارەجەدەگى 30-عا جۋىق سپورتشىلار اراسىندا قىزىقتى ءارى تارتىمدى ويىن بولىپ ءوتتى. جارىستىڭ تورەشىلەرىنىڭ شەشىمىمەن جالپى قاتىسقان ۇلداردىڭ جەڭىسىنىڭ قورىتىندىسى بويىنشا تارازدان كەلگەن سپورتشىلارى ءارتۇرلى ورىنداردان جەڭىمپاز اتانىپ، 11 مەدالدى يەلەندى، جامبىل اۋدانى-2، بايزاق-2 مەدال، سارىسۋ-1، تالاس-1، جۋالى-3 جانە قاراباستاۋ اۋىلىنىڭ سپورتشىلارى 6 مەدالدى جەڭىپ الدى. قاراباستاۋ اۋىلىنىڭ نامىسىن قورعاعاندار قاتارىندا داۋرەن اۋەلبەك، اسقار نۇر، مەيىرحان نۇرجاۋ، سارسەمباي بەك، دامير مانات ۇلى جانە ارمان اۋەلبەك جوعارى دەڭگەيدە ويىن كورسەتتى. جەڭىمپازدار مەدال، ديپلوم جانە بەكبەردى قاشكەيەۆتىڭ تۋىسقاندارىنىڭ دايىنداعان باعالى سىيلىقتارىمەن ماراپاتتالدى.

جارىس اراسىندا كورەرمەندەردىڭ الدىندا ارنايى الماتىدان كەلگەن كاراتە، دزيۋدو، سامبو كۇرەستەرى تۇرلەرىنەن سپورتشىلار ءارتۇرلى دارەجەدەگى چەمپيوندار ونەر كورسەتتى.

سپورتشى ەرلەردەن كەيىن ساحنا تورىنە ايەلدەر شىعىپ، كۇرەستى. «ايەلدەر كۇرەسىندە» ءبىرىنشى ورىندى بيلىكول دارىگەرلىك امبۋلاتورياسىنىڭ قىزمەتكەرى ەلميرا يۋسۋپوۆا جەڭىپ السا، ەكىنشى ورىندى ق. قوشمامبەتوۆ اتىنداعى ورتا مەكتەپتىڭ ءمۇعالىمى نۇرسۇلۋ ساۋدابايەۆا، ال ءۇشىنشى ورىندى بيلىكول اۋىلدىق وكرۋگىنىڭ قىزمەتكەرى نۇرسۇلۋ مۇحامەدياروۆا يەلەندى. جەڭىمپازدارعا ارنايى ديپلومدار مەن عابيت ميرازوۆتىڭ دەمەۋشىلىگىمەن اقشالاي سىي-سياپاتتار جاسالىپ، ماراپاتتالدى.

تۋرنير سوڭىندا ب.قاشكەيەۆتىڭ رۋحىنا قۇران باعىشتالىپ، قۇدايى تاماق تاراتىلدى.