دۇنگەن حالقىنىڭ مادەنيەتى ۇرپاقتان ۇرپاققا جالعاسىپ جاتقان سالت-داستۇرلەر، فولكلورى، مەرەكەلەرى مەن قۇندىلىقتارىنىڭ جيىنتىعى. جۋىردا قورداي اۋدانىنىڭ سورتوبە اۋىلىندا دۇنگەن ەتنوسىنىڭ مادەنيەتى كۇنى كەڭ كولەمدە اتالىپ ءوتۋى سونىڭ ايعاعى دەسە بولادى. اتالمىش مەرەكەنىڭ باستى ماقساتى ەتنوستىڭ مادەنيەتى مەن سالت-داستۇرلەرىن كوپشىلىككە تانىتۋ جانە قازاقستاندىق بىرەگەي قوعامدىق كەلىسىم مەن جالپى ۇلتتىق بىرلىكتى نىعايتۋ.
ءىس-شاراعا جامبىل وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى، ءتوراعا ورىنباسارى مارجان قۇجايەۆا، قورداي اۋدانى اكىمىنىڭ ورىنباسارى بەيقۇت جامانگوزوۆ، جامبىل وبلىسى قازاقستان حالقى اسسامبلەياسىنىڭ باسشىسى رانو ۋبايدۋللايەۆا باسقارعان اتالمىش ۇيىمنىڭ ءبىر توپ مۇشەلەرى، وبلىستىق دۇنگەن مادەني ورتالىقتارىنىڭ «ۆىنحۋا» قاۋىمداستىعى، ەڭبەك ارداگەرلەرى، اۋىل اقساقالدارى، جاستار، اۋداندىق ەتنوبىرلەستىكتەردىڭ وكىلدەرى قاتىستى.
سورتوبە اۋىلدىق وكرۋگىنىڭ اكىمى يلياس بۋلاروۆ سالتاناتتى تۇردە ءىس-شارانى اشقاننان كەيىن، اۋىلدىق ورتالىق كوشەسىمەن شاراعا قاتىسۋشىلار «دوستىق» مارشىن ءجۇرىپ ءوتىپ، ۇلى وتان سوعىسىنىڭ ارداگەرلەرى مەن نوعايباي بيگە ارنالعان ەسكەرتكىشتەرگە گۇل شوقتارىن قويدى.
قاتىسۋشىلار مەن قوناقتار دۇنگەن حالقىنىڭ قولدانبالى ونەرىمەن تانىسىپ، ۇلتتىق تاعامداردان اۋىز ءتيدى.
- بىرلىك، ىنتىماق پەن رۋحتىڭ مىقتىلىعىنىڭ ارقاسىندا ءبىز ەكونوميكالىق دامۋعا، ازاماتتىق كەلىسىمگە قول جەتكىزدىك. ەتنوسارالىق جانە كونفەسسيا ارالىق كەلىسىمنىڭ بىرەگەي ۇلگىسى بولىپ تابىلاتىن قازاقستان حالقى اسسامبلەياسى ۇلكەن جۇمىس اتقارۋدا. مۇنىڭ ءبارى – قازاقستان حالقىنىڭ بىرلەسكەن ەڭبەگىنىڭ جەمىسى. كەلەسى جىلى ەلىمىزدە ۇلى جەڭىستىڭ 75، اتا زاڭنىڭ 25 جىلدىعى اتالىپ وتەدى. وبلىستا 87 ەتنوس تۇرادى. بۇل دەگەنىمىز – بىرلىك جانە «رۋحاني جاڭعىرۋ»، - دەدى ءوز سوزىندە جامبىل وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى، ءتوراعا ورىنباسارى مارجان قوجايەۆا.
دۇنگەن ەتنوسىنىڭ مادەنيەتى كۇنى شەڭبەرىندە قوعام بەلسەندىلەرى قازاقستان حالقى اسسامبلەياسى جانە وبلىستىق دۇنگەن مادەني ورتالىقتارىنىڭ «ۆىنحۋا» قاۋىمداستىعىنىڭ گراموتالارى مەن سىيلىقتارىمەن ماراپاتتالدى. «ۆىنحۋا» قاۋىمداستىعىنىڭ ءتورايىمى ايشا يدىبو اۋداندىق ارداگەرلەر كەڭەسى مەن قوعامدىق كەڭەسكە 100 مىڭ تەڭگەلىك سەرتيفيكاتتاردى تارتۋ ەتتى.
ال، ءىس-شاراعا قاتىسقان ءبىرقاتار اقساقالدارعا، نوعايباي ءبيدىڭ شوبەرەسى ناسيبەدەن باراتقانوۆقا، مارجان قۇجايەۆاعا سىي-سىياپات كورسەتىلىپ، يىقتارىنا داستۇرگە ساي شاپان مەن كامزول جابىلدى.
