«كاسىپ بولماي، ءناسىپ بولماس». ەجەلدەن سولاي. بۇگىنگى تاڭدا دا بۇل قاعيدالى ءسوز ءوز ماڭىزىن جويعان جوق. قايتا جاڭا زاماننىڭ كوشىنەن قالماۋدى كوزدەگەن، جاقسى ءومىر سۇرۋگە تالپىنعان ەل ازاماتتارى مەملەكەتتىڭ كومەك-قولداۋلارى ارقىلى كاسىپ اشىپ، ءناسىبىن ۇلعايتىپ وتىرعان جايى بار. وسى تۇرعىدا جۋالى اۋدانىندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا ءوز ءىسىن اشىپ جاتقاندار قاتارى ارتىپ كەلەدى. كاسىپكەرلىك ءىسىن جاڭادان اشۋعا نيەت بىلدىرگەن ۇمىتكەرلەردى «اتامەكەن» وڭىرلىك كاسىپكەرلەر پالاتاسىنىڭ اۋداندىق فيليالى ارقىلى ارنايى كۋرستان ءوتىپ، سەرتيفيكات الۋدا.

اۋداندىق جۇمىسپەن قامتۋ ورتالىعى ماماندارىنىڭ كومەگىنە جۇگىنىپ، ءتيىستى وقىتۋ كۋرسىنان ءوتىپ، مەملەكەت تاراپىنان بولىنگەن قايتارىمسىز گرانتتى ۇتىپ العان ازاماتتىڭ ءبىرى – رۋسلان جارقىنبايەۆ.

«مال وسىرسەڭ، قوي ءوسىر، ءونىمى ونىڭ كول-كوسىر» دەگەن اتا-بابالاردىڭ ماقالىن ۇستانىپ، قويدىڭ باسىن كوبەيتۋدى كوزدەپ، مال شارۋاشىلىعىن دامىتۋدى مىقتاپ قولعا العان جاس كاسىپكەر اۋدان ورتالىعىندا تۇرادى. رۋسلان دا ءوز كەزەگىندە كاسىپكەرلەر پالاتاسىندا «باستاۋ-بيزنەس» جوباسىمەن وقىپ، شىلدە ايىندا 3 ميلليون 500 مىڭ تەڭگە كولەمىندەگى جەڭىلدەتىلگەن نەسيەگە قول جەتكىزەدى. اتاكاسىپتى كەڭەيتۋ ماقساتىنداعى نەسيە التى پايىزبەن ۇزاق مەرزىمگە بەرىلگەن. جاس كاسىپكەر قوماقتى قارجىعا جەرگىلىكتى جەردەن 94 باس انالىق باس قوي ساتىپ العان ەكەن.

– مال باعۋ – ءبىزدىڭ وتباسىعا تاڭسىق كاسىپ ەمەس. ولاي دەيتىنىم، كىشكەنتايىمىزدان ءتورت تۇلىك اسىراپ، باعىپ كەلەمىز. ونىڭ ۇستىنە اكەم جۇماعاليدىڭ ماماندىعى – مال دارىگەرى. اكەم ماعان ۇنەمى قولداۋ كورسەتىپ، مالدىڭ جايىن ايتىپ، اقىل-كەڭەستەرىن بەرىپ وتىرادى. مال باعۋ – ءبىزدىڭ قازاق حالقىنىڭ بۇرىننان كەلە جاتقان اتاكاسىبى. مەن دە وسىناۋ كاسىپتى دامىتسام دەيمىن. وعان مەملەكەت تاراپىنان دا ءتيىستى قارجىلاي قولداۋلار جاسالىپ وتىر. بۇل ءبىر جاعىنان وتباسىلىق كاسىپتىڭ ءتۇرى. باسقا جاقتان جۇمىس ىزدەپ ساندالمايمىز. ءبارى ءوز اۋلامىزدا. وسى رەتتە كاسىپ اشۋعا باعىت-باعدار بەرگەن اۋداندىق جۇمىسپەن قامتۋ ورتالىعىنىڭ ماماندارىنا، مەملەكەتتىڭ ساياساتىنا العىسىمدى جەتكىزەمىن،- دەيدى. رۋسلان جۇماعالي ۇلى.

«جاس كەلسە، ىسكە» دەمەكشى، جاس كاسىپكەر رۋسلان 505 مىڭ تەڭگە قايتارىمسىز گرانتتى دا ۇتىپ العان. ول قارجىعا 160 تاۋىق الىپ، اسىراۋدا. تيىسىنشە، ودان دا مول ءونىم الۋعا بولادى. نيەت ەتكەن ادامعا جۇمىستىڭ دا، كاسىپتىڭ دە تابىلاتىنىن جاس كاسىپكەردىڭ قولعا العان وتباسىلىق كاسىبىن كورگەن سوڭ كوز جەتكىزگەندەي بولدىق.