ەلباسى «بولاشاققا باعدار: رۋحاني جاڭعىرۋ» اتتى ماقالاسىندا: «…تۋعان جەرگە، ونىڭ مادەنيەتى مەن سالت-داستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى»، – دەگەن بولاتىن. بۇگىندە ەلىمىزدە تۋعان جەرى مەن اۋىلىنىڭ بارىن باعامداپ، جوعىن تۇگەندەۋگە، پەرزەنتتىك بورىشىن وتەۋگە نيەتتى ازاماتتار قاتارى كوبەيىپ كەلەدى.

جۋىردا بايزاق اۋدانى ا. سۋحانبايەۆ اۋىلدىق وكرۋگىنە قاراستى كوكوزەك ەلدىمەكەنىندە جاسۇزاق اسلانبەك اتىنداعى سپورت كەشەنى پايدالانۋعا بەرىلىپ، ەل يگىلىگىنە ۇسىنىلدى. اتالمىش سپورت كەشەنىن ۇلىنىڭ قۇرمەتىنە ارناعان جەكە كاسىپكەر اسىلبەك جانتايەۆ ەكىنشى نىسان «جانتاي اتا» مەشىتىن كۇردەلى جوندەۋدەن وتكىزۋگە اتسالىسىپ، اۋىل تۇرعىندارىنىڭ ريزاشىلىعىنا بولەندى. قوس بىردەي نىساننىڭ سالتاناتتى اشىلۋ راسىمىنە كەلگەن قوناقتار كەشەننىڭ سپورتتىڭ دامۋىنا سەرپىن بەرەرىنە، جاڭا مەشىت يماندىلىقتىڭ تەمىرقازىعى بولاتىنىنا سەنىمدەرىن ءبىلدىردى.

سالتاناتتى شارادا ءسوز العان اۋدان اكىمىنىڭ ورىنباسارى ءداۋىر داۋلەتوۆ ءسوز سويلەپ، كاسىپكەرگە حالىقتى سپورتقا تارتىپ جاتقانىنا زور العىسىن ءبىلدىردى. سونداي-اق، اۋدان اكىمىنىڭ اتىنان گراموتا تابىس ەتتى.

بۇدان سوڭ يگى تىلەكتەر جالعاسىن تاۋىپ، اۋىلدىق اقساقالدار كەڭەسىنىڭ ءتوراعاسى جاسۇزاق مومبەكوۆ، ەڭبەك ارداگەرلەرى ءسوز الىپ، اۋىل تۇرعىندارىنىڭ قۋانىشىنا ورتاقتاسىپ، جىلى لەبىزدەرىن ءبىلدىردى. ال، جامبىل وبلىستىق "ھيباتۋللا-تارازي" مەشىتىنىڭ وكىل يمامى قانات ءادىلحان ۇلى مەشىتتى قايتا كۇردەلى جوندەۋدەن وتكىزىپ، جاماعاتتىڭ ەركىن قۇلشىلىق ەتۋىنە قولايلى جاعداي جاساپ بەرگەن ساۋاپتى ءىسى ءۇشىن قازاقستان مۇسىلماندارى ءدىني باسقارماسىنىڭ جامبىل وبلىسىنداعى وكىلدىگى اتىنان وبلىستىڭ باس يمامنىڭ العىس حاتىن تابىس ەتتى.

جاڭا نىسان الدىنداعى كەرىلگەن لەنتانى ەلىمىزدىڭ ماقتانىشى، سامبو كۇرەسىنەن الەم چەمپيونى الماس مۇسابەكوۆ پەن №1 وليمپيادالىق مامانداندىرىلعان بالالار مەن جاسوسپىرىمدەر مەكتەبىنىڭ باسشىسى، قازاق كۇرەسىنىڭ تۇيە پالۋانى اتانعان سالكەن جارتىبايەۆ قيدى. سپورت كەشەنى مەن مەشىتتىڭ اشىلۋ قۇرمەتىنە ارنايى اس بەرىلىپ، قاسيەتتى قۇراننىڭ سۇرەلەرى وقىلدى.

بۇدان سوڭ جاسۇزاق اسلانبەك اتىنداعى سپورت كەشەنىنىڭ اشىلۋىنا ارنالعان سپورتتىق جارىستارعا كەزەك بەرىلدى. وندا شاعىن فۋتبول، قازاق كۇرەسى، ارمرەستلينگ، ۆولەيبول تۇرلەرىنەن كورشىلەس اۋداندار مەن ءوز اۋدانىمىزدىڭ اۋىلدىق وكرۋگتەرىنەن كەلگەن سپورتشىلار كۇش سىناستى. ناتيجەسىندە جارىس جەڭىمپازدارى مەن جۇلدەگەرلەرى ۇيىمداستىرۋشىلار تاراپىنان تاعايىندالعان ماراپاتتارعا يە بولدى. ءتۇس اۋا جارىستار سوڭى ۇلتتىق ويىنىمىز كوكپارعا ۇلاستى.