تاراز قالاسىنداعى تاراز مەملەكەتتىك پەداگوگيكالىق ۋنيۆەرسيتەتىندە اباي قۇنانباي ۇلىنىڭ 175 جىلدىق مەرەيتوي مەن جاستار جىلىنا وراي «جاستار جىلى – جاستارى جىرى!» اتتى وبلىستىق جاس اقىندار ايتىسى ءوتتى.

جىر دوداسىنىڭ اشىلۋ سالتاناتىندا اتالعان وقۋ ورنىنىڭ پرورەكتورى ورىنقىز جولداسوۆا ۋنيۆەرسيتەتتە جاستار جىلىندا ءبىرقاتار ءىس-شارالار ۇيىمداستىرىلعانىن، سونداي اباي قۇنانباي ۇلىنىڭ 175 جىلدىق جىلدىق مەرەيتويى قارساڭىندا اتقارىلعان شارالاردى تىلگە تيەك ەتتى.

وبلىسقا تانىمال اقىن نۇرلىبەك قۇرمانوۆ تىزگىنىن ۇستاعان ءسوز دوداسىنا سايدىڭ تاسىنداي ىرىكتەلگەن، سوزدەرى ءمىردىڭ وعىنداي وتكىر 9 اقىن قاتىسىپ، ب ا ق سىنادى. جاس اقىنداردىڭ باسەكەسىنە ايتىس اقىندارى مەن جىرشى، تەرمەشىلەردىڭ حالىقارالىق وداعىننىڭ وبلىستاعى فيليالىنىڭ ءتوراعاسى، مادەنيەت سالاسىنىڭ ۇزدىگى، ازۋلى ايتىسكەر اقىن احمەتجان وزبەكوۆ، ەلىمىزگە تانىمال ءبىرقاتار ايتىس اقىندارىنىڭ توماعاسىن سىپىرعان بەلگىلى اقىن ايتمۇحانبەت يساقوۆ، تارمپۋ «قازاق فيلولوگياسى جانە لاتىن گرافيكاسىن وقىتۋ ادىستەمەسى» كافەدراسىنىڭ دوسەنتى، فيلولوگيا عىلىمدارىنىڭ كانديداتى سەيسەكۇل يسماتوۆا قازىلىق ەتتى.

ءسوز باسەكەسىندە العاش بولىپ ساحناعا تارازدىق ديدار ابباس پەن مەدەۋ مىرزاتاي شىقتى. جاستار ايتىسىندا ىسىلىپ، توسەلىپ قالعان قوس اقىن ءوز دەڭگەيلەرىندە ءسوز قاعىستىرىپ، ءوڭىر تاريحىن جىرلارىنا ارقاۋ ەتتى. مۇنان سوڭ تارازدىق نۇرجان ماناتبەك پەن جامبىل اۋدانىنان كەلگەن ەلىبەك نۇرماعانبەتوۆ ايتىستى. سونداي-اق تاعى ءبىر جامبىل اۋدانىنىڭ نامىسىن قورعاۋ ءۇشىن كەلگەن مەرەيحان رايىمبايەۆ پەن شۋلىق ايىم كوشەرباي دا قىز بەن جىگىت ايتىسىن جاساپ، كورەرمەننىڭ ىستىق ىقىلاسىنا بولەندى. بايزاقتىق ەرنۇر بەيسەنوۆ پەن مەركىلىك مۇقاعالي بالتابەك تە قاعىتپا قالجىڭدى ولەڭ شۋماقتارىنا ۇيلەسىمدى كىرىكتىرە وتىرىپ، جاستارعا كورسەتىلىپ جاتقان قولداۋ ساياساتىن دا جىرلارىنا ارقاۋ ەتە ءبىلدى. ال شۋ اۋدانىنان كەلگەن ادىلەت مەدەتقۇل مەن تارازدىق مەدەۋ مىرزاتاي ايتىسىپ، ءوڭىردىڭ ارعى-بەرگى تاريحى مەن اباي جىرلارى تۋرالى ويلارىنا ورتاعا سالدى.

سونىمەن جىر دوداسىنىڭ قورىتىندىسى بويىنشا جۇلدەلى ءى ورىن بايزاقتىق ەرنۇر بەيسەنوۆكە بۇيىردى. ال ءىى ورىن شۋلىق اقىن ادىلەت مەدەتقۇلدىڭ ەنشىسىندە كەتسە، ءىىى ورىندى جامبىل اۋدانىنىڭ جاس جامپوزى ەلىبەك نۇرماعامبەتوۆ ەنشىلەدى. سونداي-اق ونەر جاناشىرى ءاليا ارزىمبەتوۆا ءوز اعاسى تەمىرلان ارزىمبەتوۆ اتىنداعى ارنايى جۇلدەلەردى تاراز قالاسىنان قاتىسقان ديدار ابباس پەن نۇرجان ماناتبەككە تابىستادى.