جول-كولىك وقيعالارىنىڭ الدىن الۋ ماقساتىندا جامبىل وبلىسىندا «ارقان» اۆتوماتتاندىرىلعان موبيلدىك كەشەنى قولدانىسقا ەنگىزىلدى. ەلىمىزدە تۇڭعىش رەت ىسكە قوسىلىپ وتىرعان كەشەننىڭ قۇنى 160 ميلليون تەڭگەنى قۇرايدى. بۇل قارجىعا 10 جول-پاترۋلدىك پوليسياسى اۆتوكولىكتەرىنە اتالعان كەشەن ورناتىلعان. بۇل كولىكتەر الداعى ۋاقىتتا رەسپۋبليكالىق ماڭىزى بار اۆتوجولداردىڭ بويىندا ءجۇرىپ، قۇقىق بۇزۋشىلاردى انىقتاماق.

ءموبيلدى كەشەننىڭ جول قوزعالىسى ەرەجەلەرىن باقىلاۋدا مۇمكىندىگى مول. ماسەلەن، ءجۇرىپ وتكەن كولىك قۇرالدارى تۋرالى بارلىق اقپارات پوليسيا دەپارتامەنتىنىڭ سەرۆەرىندە اۆتوماتتى تۇردە ساقتالاتىن بولادى. سونداي-اق ءنومىر، ماركاسى، مودەلى نەمەسە ءتۇسى بويىنشا كولىك قۇرالدارىن ىزدەۋگە سۇراۋ سالۋدى جۇزەگە اسىرىپ، جۇرگىزۋشىنىڭ جىلدامدىقتى اسىرۋ دەرەگى اۆتوماتتى تىركەلەدى. بۇدان وزگە بۇرىن جاسالعان اكىمشىلىك قۇقىق بۇزۋشىلىق ءۇشىن بورىشكەرلەر تىزىمىندە بولۋى اۆتوماتتى تۇردە تەكسەرىلەدى. سونىمەن قاتار ايىپپۇل تۋرالى دەرەكتەر مەن بەينەاقپاراتتار دەرەكتەردى وڭدەۋ ورتالىعىنا جانە باس پروكۋراتۋرانىڭ ءبىرىڭعاي تىزىلىمىنە پوليسيا قىزمەتكەرىنىڭ قاتىسۋىنسىز اۆتوماتتى رەجيمدە جىبەرىلەدى. بۇل ءوز كەزەگىندە سىبايلاس جەمقورلىقتى ازايتۋعا مۇمكىندىك بەرەدى ەكەن.

– وزدەرىڭىز بىلەتىندەي، ءبىزدىڭ مىندەتىمىز قوعامدىق ءتارتىپتى ساقتاۋ عانا ەمەس، سونىمەن قاتار جول قوزعالىسىن ۇيىمداستىرۋ. بۇگىنگى كۇنى ءبىزدىڭ الدىمىزدا ەڭ ماڭىزدى ەكى ماسەلە تۇر. ونىڭ ءبىرى كامەلەتكە تولماعاندارعا قاتىستى قىلمىس بولسا، ەكىنشىسى جول-كولىك وقيعالارى. سەبەبى، بيىلعى جىلى جول-كولىك اپاتتارىندا قازا بولعاندار سانى ارتىپ وتىر. جۇرگىزىلگەن تالداۋعا سايكەس ءاربىر ءۇشىنشى جول اپاتى جۇرگىزۋشىلەردىڭ جىلدامدىقتى ارتتىرۋ سەبەبىنەن ورىن العان. وسىعان وراي، ءبىز وبلىس اكىمىنە جولداعى اپاتتىلىق دەڭگەيىن تومەندەتۋ ماقساتىندا اۆتوماتتاندىرىلعان ءموبيلدى كەشەندى ورناتۋ ءۇشىن قاراجات ءبولۋ تۋرالى ۇسىنىسپەن شىققان بولاتىنبىز. ناتيجەسىندە اتالعان ۇسىنىس قولداۋ تاۋىپ، ءموبيلدى كەشەن بۇگىنگى كۇنگە رەسپۋبليكالىق ماڭىزى بار اۆتوجولداردىڭ باتىستان شىعىسقا 500 شاقىرىم، وڭتۇستىكتەن سولتۇستىككە 400 شاقىرىمدا قىزمەت كورسەتەتىن 10 پاترۋلدىك اۆتوكولىككە ورناتىلدى، – دەيدى وبلىستىق پوليسيا دەپارتامەنتىنىڭ باستىعى، پوليسيا پولكوۆنيگى ارمان ورازالييەۆ.

ارمان مولديار ۇلىنىڭ سوزىنە سەنسەك، ءموبيلدى كەشەننىڭ ءبىزدىڭ وڭىردە ەنگىزىلۋى بەكەر ەمەس ەكەن. سەبەبى، ايماقتا جول كولىك اپاتتارىنان ادام قايتىس بولعانداردىڭ سانى بيىل 28 پايىزعا ارتىپ كەتىپتى. ونىڭ ىشىندە ءاربىر 3ء-شى اپاتتىڭ ورىن الۋىنا كولىك جۇرگىزۋشىلەرىنىڭ جىلدامدىقتى شامادان تىس ارتتىرۋى سەبەپ بولعان. دەگەنمەن وتكەن جىلمەن سالىستىرعاندا اۆتوكولىك اپاتتارى ازايعان. ياعني، وتكەن جىلدىڭ ءدال وسى كەزەڭىندە 1666 وقيعا تىركەلىپ، 132 ادام اجال قۇشقان. ال بيىل 1161 وقيعا ورىن الىپ، 169 ازامات ومىرمەن قوش ايتىسىپتى.