بۇل تۋرالى ق ر پرەمەر-مينيسترىنىڭ ورىنباسارى بەردىبەك ساپاربايەۆتىڭ توراعالىعىمەن وتكەن زەينەتاقى جۇيەسىن ودان ءارى جەتىلدىرۋ بويىنشا جۇمىس توبىنىڭ كەزەكتى وتىرىسىندا ايتىلدى دەپ حابارلايدى "Qamshy.kz" اقپارات اگەنتتىگى primeminister.kz سايتىنىڭ دەرەگىن نەگىزگە الىپ.

كەزدەسۋدە اۋەلى زەينەتاقى جۇيەسىنىڭ تيىمدىلىگىن ارتتىرۋ ماسەلەسى قارالدى.

«جالپى، مەملەكەت باسشىسى جۇمىس توبىنىڭ ۇسىنىستارىن قولدادى. ەندى پرەزيدەنتتىڭ تاپسىرمالارىن ەسكەرۋمەن ءبىزدىڭ جۇمىسىمىزدى جالعاستىرۋ قاجەت، ونىڭ ىشىندە زەينەتاقى جۇيەسىن ودان ءارى جاڭعىرتۋدى جەدەلدەتۋ، اكىمشىلىك شىعىنداردى قىسقارتۋ، ەڭ تومەنگى جالاقى كولەمىن جانە جيناقتاۋشى زەينەتاقى جۇيەسىنىڭ تيىمدىلىگىن ارتتىرۋ ماسەلەسىن پىسىقتاۋ كەرەك»، – دەدى ب. ساپاربايەۆ.

"تيىمدىلىگىن ارتتىرۋ" دەمەكشى، پرەمەر-مينيسترىنىڭ ورىنباسارى ءتورت كوز تۇگەل جينالعان باسقوسۋدا زەينەتاقى جيناقتارىنىڭ ءبىر بولىگىن پايدالانۋ باستاماسى بويىنشا دا توقتالىپ ءوتتى: 

«تۇرعىن ءۇي ساتىپ الۋ جانە قىمبات تۇراتىن ەمگە اقى تولەۋ ءۇشىن زەينەتاقى جيناقتارىن پايدالانۋ ۇسىنىسىنا قولداۋ ءبىلدىرىلدى. بۇل قۇقىقتى پايدالانا الاتىن ازاماتتاردى كەزەڭ-كەزەڭمەن قامتۋدى ارتتىرۋدى ەسكەرۋمەن قوسىمشا ەسەپتەۋلەر جۇرگىزۋ قاجەت»، – دەدى بەردىبەك ماشبەك ۇلى.

اتاپ وتەلىك، جيىنعا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، «قازاقستان قارجىگەرلەر قاۋىمداستىعى» زتب كەڭەسىنىڭ ءتوراعاسى ەلەنا باحمۋتوۆا، «First Heartland Jysan Bank» اق ديرەكتورلار كەڭەسىنىڭ مۇشەسى بولات جامىشيەۆ، ق ر پرەزيدەنتىنىڭ شتاتتان تىس كەڭەسشىلەرى تامارا دۇيسەنوۆا جانە ولجاس قۇدايبەرگەنوۆ، سونداي-اق مەملەكەتتىك ورگاندار مەن ۇكىمەتتىك ەمەس ۇيىمداردىڭ، «اتامەكەن» ۇكپ وكىلدەرى، ساراپشىلار مەن قوعام قايراتكەرلەرى قاتىسقان.