بۇگىن، 26 قاڭتاردا كانادانىڭ مونرەال قالاسىنداعى "Montreal Casino" ارەناسىندا مەكسيكالىق ريكاردو لاراعا (22-7، 10KO) قارسى  جەكپە-جەك وتكىزگەن قازاقستاندىق كاسىپقوي بوكسشى باتىر جۇكەمبايەۆ مەرزىمىنەن بۇرىن جەڭىسكە جەتتى. 

ءبىرىنشى جارتىلاي ورتا سالماقتا (63،5 كگ) وتكەن كەزدەسۋ 10 راۋندقا جوسپارلانعان ەدى. الايدا جۇكەمبايەۆ قارسىلاسىن ەكىنشى راۋندتا ەكى رەت نوكداۋنعا جىبەرگەن سوڭ مەكسيكالىق بوكسشىنىڭ سەكۋندانتتارى جەكپە-جەكتى جالعاستىرۋدان باس تارتتى.

بۇل - 28 جاستاعى جۇكەمبايەۆتىڭ كاسىپقوي بوكستاعى 18-جەڭىسى. بۇعان دەيىن 17 جەكپە-جەك وتكىزگەن ول بارلىعىندا جەڭىسكە جەتكەن. 13 كەزدەسۋدە قارسىلاستارىن مەرزىمىنەن بۇرىن ۇتقان. سوڭعى رەت ول وتكەن جىلى قىركۇيەك ايىندا مەكسيكالىق ميگەل ۆاسكەستى جەڭگەن ەدى. 

جۇكەمبايەۆ كاسىپقوي بوكسشىلاردىڭ رەيتينگىن جاساپ وتىراتىن Boxrec سايتىنىڭ ءتىزىمى بويىنشا ءوز سالماعىنداعى 1690 بوكسشىنىڭ اراسىندا 19-ورىندا كەلە جاتىر. ول WBC تۇجىرىمى بويىنشا 14ء-ى، ال IBF تۇجىرىمى بويىنشا 15-ساتىدا تۇر. قازاقستاندىق بوكسشىدا ءقازىر ءوز سالماعىنداعى ءىۆو International، WBC Continental Americas، WBA Continental، IBF Inter-Continental چەمپيوندىق بەلبەۋلەرى بار. ءبىراق بۇل بەلبەۋلەردىڭ بارلىعى كاسىپقوي بوكستا ءۇشىنشى، ءتورتىنشى داراجەلى سانالادى. 

باتىر جۇكەمبايەۆ - جامبىل وبلىسى شۋ اۋدانىنىڭ تۋماسى. ول 2015 جىلدان بەرى كاسىپقوي بوكستا ءجۇر. قازاقستاندىق بوكسشى "Eye of the tiger management" پروموۋتەرلىك كومپانياسىمەن جۇمىس ىستەيدى. كانادانىڭ مونرەال قالاسىندا تۇراتىن جۇكەمبايەۆ كاسىپقوي بوكستاعى بارلىق جەكپە-جەگىن وسى مەملەكەت اۋماعىندا وتكىزىپ ءجۇر.