سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ ەلىمىزدە كاسىپكەرلەردىڭ 76 پايىزى پاراسىز جۇمىس ىستەپ كەلەدى دەپ مالىمدەدى. بۇل تۋرالى inform.kz حابارلايدى.

«پاراساتتىلىق ءارى ادالدىق تەك مەملەكەتتىك قىزمەتتە عانا ەمەس، بيزنەس تە دە نەگىزگى ونەگەلى باعىت بولۋى ءتيىس. كاسىپكەرلەر ساناسىنىڭ ترانسفورماسياسى – ەكونوميكانىڭ باسەكەگە قابىلەتتىگىن دامىتۋدىڭ مىندەتتى شارتى. ەگەر دە جەمقورلىققا قارسى كومپلاەنس (سىبايلاس جەمقورلىققا قارسى ءىس-قيمىلدىڭ كورپوراتيۆتىك باعدارلاماسى) ينستيتۋتى تولىق كۇشىندە جۇمىس ىستەسە، وندا بۇل پروسەسس ەلەۋلى تۇردە جاندانادى. ۇلتتىق كومپانيالار مەن جەكە سەكتورلاردا كومپلاەنس-وفيسەرلەردىڭ پايدا بولۋى بيزنەس پاراساتتىلىعى دەڭگەيىنىڭ وسۋىنە وڭتايلى ىقپال ەتەدى. قازىرگى كەزدە ءتيىستى زاڭ جوباسى پارلامەنتتىڭ قاراۋىندا. بيزنەستىڭ ەۆوليۋسياسى ءۇشىن ماڭىزدى العىشارتتار بار ەكەنىن اتاپ وتكەن ءجون. Transparency Kazakhstan ساۋالناماسىنا سايكەس، كاسىپكەرلەردىڭ 76 پايىزى ءوز بيزنەسىن پارا بەرمەي دامىتىپ كەلەدى، ياعني تازا قۇقىقتىق كەڭىستىكتە قىزمەت ەتۋدە. ءوز كەزەگىندە اگەنتتىك جەمقورلىققا قارسى شارالار ارقىلى ادال بيزنەسكە قولداۋ جاساپ وتىر»، - دەپ اتاپ ءوتتى  شپەكبايەۆ اگەنتتىكتىڭ 2019 جىلعى جۇمىس قورىتىندىسىنا ارنالعان القا ماجىلىسىندە.

شلەكبايەۆتىڭ ايتۋىنشا، بيزنەس ىسىنە زاڭسىز ارالاسۋدىڭ 358 فاكتىسى انىقتالىپ، 400 كاسىپكەردىڭ قۇقىعى قورعالدى. بۇگىندە اگەنتتىك قورعاۋىندا جالپى سوماسى 12 ترلن تەڭگەدەن استام قارجى قۇراپ وتىرعان 400-دەن ارتىق جوبا تۇر.