پارلامەنت سەناتىنىڭ ءتوراعاسى داريعا نازاربايەۆا ينكليۋزيۆتى ءبىلىم بەرۋ دەڭگەيىنىڭ تومەندىگى مەن دامۋىندا ەرەكشەلىكتەرى بار بالالارعا ارنالعان ينفراقۇرىلىمنىڭ جوقتىعى تۋرالى ماسەلە كوتەردى. بۇل تۋرالى قازاقپارات  حابارلايدى.

مۇگەدەكتىگى بار ادامدار قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ بويىنشا ۇسىنىستار ازىرلەۋ جونىندەگى جۇمىس توبى جۇمىسىنىڭ ناتيجەسى تۋرالى اقپارات كۇن تارتىبىندەگى ءبىرىنشى ماسەلە بولدى. وتىرىس بارىسىندا الەۋمەتتىك-مادەني دامۋ جانە عىلىم كوميتەتىنىڭ ءتوراعاسى مۇرات باقتيار ۇلى مۇگەدەكتىگى بار ادامدار قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندە 62 ۇسىنىس ازىرلەنگەنىن اتاپ ءوتتى.

«بارلىق ۇسىنىستاردىڭ 42ء-سى زاڭنامالىق اكتىلەرگە، 20-سى زاڭنان كەيىنگى اكتىلەرگە وزگەرىستەر مەن تولىقتىرۋلار ەنگىزۋ تۋرالى بولدى»، - دەدى م.باقتيار ۇلى.

سەنات ءتوراعاسى ءوز كەزەگىندە جينالعان ۇسىنىستاردى بارشاعا ورتاق تالقىلاۋ ءۇشىن اقپاراتتىق رەسۋرستاردا جاريالاۋ قاجەتتىگىن اتاپ ءوتتى.

«زاڭداردى، نورماتيۆتەردى، ادىستەمەلەردى جاقسارتۋ جانە وسى قۇجاتتاردى جۇمىس ىستەتۋ، جاۋاپكەرشىلىكتى كۇشەيتۋ ءۇشىن بارلىق مۇمكىندىكتى جاساۋ – ءسىز بەن ءبىزدىڭ مىندەتىمىز. بۇل اسا ماڭىزدى ءارى اۋقىمدى جۇمىسقا ەڭ سوڭىندا بۇكىل قوعامدى تارتۋ كەرەك. سەبەبى بۇل تەك مەملەكەت پەن الەۋمەتتىك قىزمەتتەردىڭ عانا مىندەتى ەمەس. كوپ نارسە اركىمنىڭ كوزقاراسىنا بايلانىستى ءارى ءبارىمىز دە ادامبىز»، - دەدى داريعا نازاربايەۆا.

سەنات ءتوراعاسى ينكليۋزيۆتى ءبىلىم بەرۋ دەڭگەيىنىڭ تومەندىگىن، دامۋىندا ەرەكشەلىكتەرى بار بالالارعا ارنالعان قاجەتتى ينفراقۇرىلىمنىڭ جوقتىعىن دا اتاپ ءوتتى.

«قالالىق كولىك تە سولاردىڭ قاتارىندا. ءبىز بيۋدجەت قارجىسىن قالالىق كولىك ساتىپ الۋعا جۇمسايتىن بولساق، وندا مۇمكىندىگى شەكتەۋلى ادامدار دا وسى كولىكتى پايدالانا الاتىنداي ءتيىستى تەحنيكانىڭ بولعانى مىندەتتى بولۋى ءتيىس. بۇل تەمىرجول كولىگى مەن اۋە قاتىناسىنا دا قاتىستى»، - دەدى پالاتا باسشىسى.

بيۋرو مۇشەلەرى سەناتتىڭ 6 اقپاندا وتەتىن كەزەكتى وتىرىسىنىڭ كۇن ءتارتىبى بويىنشا ۇسىنىستاردى دا قارادى. وتىرىستا سالىق كەلىسىمدەرىنە قاتىستى شارالاردى ورىنداۋ جونىندەگى كوپجاقتى كونۆەنسيانى، شىۇ-نىڭ ەكسترەميزمگە قارسى ءىس-قيمىل جونىندەگى كونۆەنسياسىن، تۇنشىقتىرعىش، ۋلى نەمەسە باسقا دا ۇقساس گازدار مەن باكتەريولوگيالىق قۇرالداردى سوعىستا قولدانۋعا تىيىم سالۋ تۋرالى حاتتامانى راتيفيكاسيالاۋ تۋرالى زاڭ جوبالارىن قاراۋ جوسپارلانۋدا.

سەناتورلار پارلامەنت ماجىلىسىندە ماقۇلدانعان زاڭ جوبالارىن ءبولىپ بەردى. سەناتتىڭ ەكونوميكالىق ساياسات، يننوۆاسيالىق دامۋ جانە كاسىپكەرلىك كوميتەتى «دۇنيەجۇزىلىك پوشتا وداعىنىڭ جارعىسىنا توعىزىنشى قوسىمشا حاتتامانى راتيفيكاسيالاۋ تۋرالى» زاڭ جوباسى بويىنشا قورىتىندىنى ودان ءارى پىسىقتاۋ جانە دايىنداۋ جونىندەگى باس كوميتەت بولىپ بەلگىلەندى.

«قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى زاڭسىز كوشى-قونعا قارسى كۇرەستەگى ىنتىماقتاستىق تۋرالى كەلىسىمدى بەكىتۋ تۋرالى» زاڭ جوباسى بويىنشا سەناتتىڭ باسقا كوميتەتتەرىنىڭ ۇسىنىستارىن قورىتۋ جانە قورىتىندى ازىرلەۋ حالىقارالىق قاتىناستار، قورعانىس جانە قاۋىپسىزدىك كوميتەتىنە تاپسىرىلدى.

سونىمەن قاتار، بيۋرو وتىرىسىندا پارلامەنتتىك تىڭداۋلارعا ازىرلىك جانە وتكىزۋ تۋرالى ماسەلە قارالدى.

28 اقپاندا «اگروونەركاسىپتىك كەشەندى دامىتۋ ماسەلەلەرى» تاقىرىبى بويىنشا تىڭداۋ وتكىزۋ جوسپارلاندى، ال ناۋرىز ايىنىڭ باسىندا «قازاقستاننىڭ جەڭىل ونەركاسىبى: ونىمدىلىگى جوعارى بيزنەستىڭ قازىرگى جاعدايى مەن دامۋ بولاشاعى» جانە «قازاقستاننىڭ ترانزيتتىك الەۋەتىن دامىتۋ» اتتى تىڭداۋلار وتەدى.