پرەزيدەنت قاسىم جومارت كەمەل ۇلى توقايەۆتىڭ جاستار كادرلىق رەزەرۆىن قالىپتاستىرۋ باعدارلاماسىن جۇزەگە اسىرۋ، جاس ۇستازدارمەن وي ءبولىسۋ، پىكىر الماسۋ، جاس مامانداردىڭ ۇنىنە قۇلاق ءتۇرۋ، قازىرگى جاس ءمۇعالىمنىڭ بولاشاقتا بىلىكتى، ىسكەر مامان رەتىندە قالىپتاسۋىنا ىقپال ەتۋ ماقساتىندا «تاۋەلسىز ەل جاستارى» قوعامدىق قورى «تۇلعامەن كەزدەسۋ» جوباسى اياسىندا ءبىلىم باسقارماسى باسشىسى جىلقىبايەۆا ءلاززات اۋەزحانقىزىمەن N168 مەكتەپ-گيمنازياسىندا كەزدەسۋ ءوتتى. بۇل تۋرالى Qamshy.kz اقپارات اگەنتتىگى ءتىلشىسى حابارلايدى! 

"بۇگىنگى كەزدەسۋدىڭ باستى سەبەبى، الماتى قالاسىنداعى العاشقى "ىسكەر ۇستاز" اتتى جاس ۇستازدار كلۋبىنىڭ قۇرىلۋى. كلۋبتى قۇرۋداعى نەگىزگى ماقسات - جاس ۇستازداردىڭ ءارى قاراي سالا بويىنشا تولىققاندى ءوزىن-وزى دامىتۋ. قازىرگى تاڭدا الماتى قالاسىندا 1277 گە جۋىق ءبىلىم بەرۋ ۇيىمى بار، ونىڭ ۇيىمىندا 32 مىڭنان اسا ۇستاز جۇمىس جاسايدى. ونىڭ 30%  جاس ماماندار. 2020 جىلدىڭ ەڭ باستى جاڭالىعى ءمۇعالىم مارتەبەسى تۋرالى زاڭنىڭ قابىلدانۋى ەكەنى بارشامىزعا ءمالىم، سونىمەن قاتار جاس ۇستازدارعا ارنايى ءىس-شارالاردىڭ اتقارىلۋى. مىنەكەي، وسىنداي ءىس شارالار الماتى قالاسىندا دا باستاۋىن تاپتى. سونىڭ العاشقىسى - "ۇزدىك ۇستاز" بايقاۋى"، - دەپ ايتتى ءلاززات جىلقىبايەۆا.

كەزدەسۋ بارىسىندا جاس مامانداردىڭ ماسەلەلەرى، الداعى ۋاقىتتاعى دامۋ جوسپارى، سونداي-اق «پەداگوگ ستاتۋسى تۋرالى» زاڭ تالقىلاندى. كەزدەسۋ ەركىن فورماتتا الماتى قالاسى جاس ۇستازدارىنان قۇرىلعان «ىسكەر ۇستاز» جاس مۇعالىمدەر كلۋبى جاستارىمەن وتكىزىلدى.