تۇرعىندار اراسىندا جاپپاي توبەلەستى بولدى دەلىنگەن قورداي اۋدانى ماساچي اۋىلىنا باراتىن جولدى پوليسيا مەن وماندار جاۋىپ تۇر. ماساچيعا 40 شاقىرىمداي جەردەگى قاراسۋ اۋىلىنىڭ كىرەبەرىسىنە بلوك پوست قويىلعان. بۇل تۋرالى وقيعا ورنىندا جۇرگەن قامشى ءتىلشىسى حابارلادى.

ۇيالى بايلانىس ناشار. ينتەرنەتكە كىرۋ مۇمكىندىگى جوق.

قاراسۋ اۋىلىنىڭ كىرەبەرىسىندە 500-دەي ادام ءجۇر. ولاردىڭ دەنى جاستار. اراسىندا ەرەسەكتەر دە بار. ولار پوليسيا قىزمەتكەرلەرىنەن ماساچي اۋىلىنا باراتىن جولدى اشۋدى تالاپ ەتىپ جاتىر. 

پوليسيا ماساچيعا قاراي ادامداردى وتكىزبەي جاتقانىمەن، ول جاقتان شىعىپ جاتقان كولىكتەر كوپ. قامشى ءتىلشىسى قاراسۋ اۋىلىنىڭ كىرەبەرىسىنە قويىلعان بلوك پوستان قوردايعا قاراي كەمىندە بەس جەدەل جاردەم كولىگى شىققانىن كورگەن. ماساچيعا باراتىن جولدى اشۋدى تالاپ ەتىپ وتىرعان ازاماتتار جەدەل جاردەم كولىكتەرىنىڭ جولىن بوگەپ، ىشىندە كىمنىڭ بارىن كورسەتۋىن تالاپ ەتتى. الايدا وعان پوليسيا قىزمەتكەرلەرى مۇمكىندىك بەرمەي، جەدەل جاردەم كولىگىن قالىڭ ادام ءنوپىرىنىڭ اراسىنان شىعارىپ جىبەردى.

قامشى ءتىلشىسى قاراسۋ اۋىلىنداعى  پوليسيا مەن ارنايى جاساق بوگەتىنەن ءوتىپ، ماسانشى اۋىلىنا بارا جاتىر. وقيعا بارىسى الداعى ۋاقىتتا حابارلانادى.

بۇعان دەيىن الەۋمەتتىك جەلىدە جامبىل وبلىسى قورداي اۋدانىندا دۇنگەن ۇلتىنىڭ ازاماتتارى "80 جاستاعى قازاق قاريا مەن ونىڭ ەكى بالاسىن ارماتۋرامەن، بالعامەن ۇرىپ، باسىن جارعانى" تۋرالى اقپارات تاراعان. الەۋمەتتىك جەلىدە تاراعان ۆيدەولاردىڭ بىرىندە پوليسيا وكىلدەرى مەن ازاماتتار اراسىندا قاقتىعىس بولىپ جاتقانى بايقالدى.

وقيعا تۋرالى پرەزيدەنت قاسىم-جومارت توقايەۆ تۋيتتەردە "جامبىل وبلىسى قورداي اۋدانىندا بۇزاقىلىق سيپاتتاعى جاپپاي توبەلەس بولدى. ونى ارانداتۋشىلار ءوز پايداسىنا قولدانباق بولعان. پوليسيا جاعدايدى رەتتەپ، ءوز باقىلاۋىنا الدى. قوعامدىق ءتارتىپتى بۇزعاندار جاۋاپكەرشىلىككە تارتىلادى" دەپ جازدى.

جامبىل وبلىسى پوليسيا دەپارتامەنتىنىڭ باسپا ءسوز قىزمەتى "جامبىل وبلىسى پوليسيا دەپارتامەنتىنىڭ تەرگەۋ باسقارماسى قازاقستان رەسپۋبليكاسى قىلمىستىق كودەكسىنىڭ 293-بابى (بۇزاقىلىق) بويىنشا سوتقا دەيىنگى تەرگەۋدى باستادى. قاقتىعىستى باستاۋشىلار مەن قاتىسۋشىلار انىقتالۋدا. جامبىل وبلىسىنىڭ پوليسيا دەپارتامەنتى ازاماتتاردان تەك رەسمي اقپاراتقا سەنۋدى جانە قاۋەسەتتەر مەن جالعان حابارلامالاردى تاراتپاۋدى سۇرايدى. جالعان اقپاراتتى، ونىڭ ىشىندە الەۋمەتتىك جەلىلەر مەن مەسسەندجەرلەر ارقىلى تاراتقانى ءۇشىن قىلمىستىق جاۋاپكەرشىلىك قاراستىرىلاتىنىن ەسكەرتەمىز" دەگەن حابارلاما تاراتتى.