كەشە الەۋمەتتىك جەلىدە جامبىل وبلىسى قورداي اۋدانىندا دۇنگەن ۇلتىنىڭ ازاماتتارى "80 جاستاعى قازاق قاريا مەن ونىڭ ەكى بالاسىن ارماتۋرامەن، بالعامەن ۇرىپ، باسىن جارعانى" تۋرالى اقپارات تارادى. سالدارىنان بىرنەشە ادام قايتىس بولىپ، كوپتەشەن تۇرعىن زارداپ شەككەن. وسى وقيعاعا بايلانىستى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءوزىنىڭ ينستاگرام پاراقشاسىندا حالىقتى بىرلىككە شاقىردى.
"مەملەكەتىمىزدىڭ باستى بايلىعى – ەلدىڭ تاتۋلىعى. بەيبىت ەلدە عانا بەرەكە بولادى. شاعىن كيكىلجىڭنەن قانداي جاعدايدىڭ ورىن الاتىنىن كەشەگى قورداي وقيعاسى كورسەتىپ وتىر. ەرەگىستىڭ سوڭى ۇلكەن جانجالعا ۇلاستى. ادام شىعىنى بولدى. ولاردىڭ يمانى سالامات بولسىن. ءبىز وسىنداي ساتتەردە اشۋدى اقىلعا جەڭدىرىپ، سابىرلىق تانىتقانىمىز ءجون" دەپ بايبەك حالىقتى سابىرعا شاقىردى.
سونداي-اق ول ەل پرەزيدەنتى قاسىم-جومارت توقايەۆتىڭ قوردايدا ورىن العان وقيعاعا بايلانىستى مالىمدەمە جاساپ، قازا بولعان ازاماتتاردىڭ وتباسىلارىنا كوڭىل ايتقانىن اتاپ ءوتتى. زارداپ شەككەندەرگە ءتيىستى كومەك كورسەتۋدى تاپسىردى. ەلدە زاڭ ۇستەمدىگىنىڭ ساقتالاتىنىن قاداپ ايتىپ، پرەمەر-مينيستردىڭ ورىنباسارى ءتوراعالىق ەتەتىن ۇكىمەت كوميسسياسىن قۇرعانىن دا ايتا كەتتى.
"قازاقستاننىڭ تىنىشتىعى، ەڭ الدىمەن، ەل يەسى حالقىمىزعا كەرەك. زاڭعا باعىنۋ – بارلىق قازاقستاندىقتاردىڭ مىندەتى. قۇزىرلى ورگاندارعا كۇش كورسەتۋگە ەشكىمگە جول بەرىلمەيدى. ۇلتارالىق قارىم-قاتىناس – وتە نازىك دۇنيە. اپ-ساتتە ءبۇلدىرىپ الۋ وڭاي. ەگەر ەلدە تاتۋلىق بولماسا، ەڭ الدىمەن زارداپ شەگەتىن حالىق. زاڭعا جۇگىنگەن، تاتۋلىق پەن ەلدىكتى مۇرات ەتكەن ەلباسى ساياساتىن ۇستانعان ەلمىز. بارلىق ماسەلە زاڭ اياسىندا شەشىلۋى ءتيىس. بارشامىز، ەڭ الدىمەن، پارتيالاستار، وسىعان ۇمتىلۋىمىز كەرەك"، – دەدى باۋىرجان بايبەك.
پىكىر قالدىرۋ