قوردايداعى ورىن العان تارتىپسىزدىك كەزىندە زارداپ شەككەن اقساقال ۇيىنە شىعارىلدى. بۇل تۋرالى جامبىل وبلىسى اكىمدىگى حابارلادى.

قوردايداعى ورىن العان جاعدايدان كەيىن الماتى قالاسىنداعى اۋرۋحاناعا تۇسكەن اقساقال ۇيگە شىعارىلدى. ءقازىر ول ءوز ۇيىندە جەرگىلىكتى دارىگەرلەردىڭ باقىلاۋىندا. 

سونداي-اق جامبىل وبلىسىنداعى اۋرۋحانالاردا ەمدەلىپ جاتقان ءۇش ناۋقاس بار. ولاردىڭ ءبىرى قورداي اۋدانىنداعى ورتالىق اۋرۋحانادا دارىگەرلەردىڭ قاراۋىندا. ونىڭ جاعدايى جاقسى. ال ەكى ناۋقاس تاراز قالالىق كوپسالالى اۋرۋحاناسىندا، ولاردىڭ دا جاعدايى قاناعاتتانارلىقتاي.

جامبىل وبلىسى قورداي اۋدانىنداعى جاپپاي ورىن العان تارتىپسىزدىكتەر 8 اقپانعا قاراعان ءتۇنى بولدى. رەسمي مالىمەتتەرگە سۇيەنسەك، 11 ادام قازا تاۋىپ، 185 ادام جاراقات الدى. سونىمەن قاتار 39 ءۇي، 20 ساۋدا ورتالىعى جانە 47 كولىك ورتەندى. 

جامبىل وبلىسىنىڭ جاڭا اكىمى بەردىبەك ساپاربايەۆتىڭ ايتۋىنشا، ءقازىر قوردايداعى جاعداي تۇراقتى، قۇقىق قورعاۋ جۇمىستارى جۇرگىزىلۋدە.