كوروناۆيرۋس قىتايدىڭ ءۇش پروۆينسياسىنداعى بەس تۇرمەگە جەتتى. قازىرگى تاڭدا 500-گە جۋىق تۇتقىن اۋىرىپ جاتىر. بۇل تۋرالى جۇڭگو ادىلەت مينيسترلىگىنىڭ وكىلى حە پينگ مالىمدەدى.

مينيسترلىكتىڭ مالىمەتىنشە، چجەسزيان پروۆينسياسىنداعى "شيليفەن" تۇرمەسىندە كوروناۆيرۋستىڭ جاڭا تۇرىمەن اۋىرعاندار سانى 34 ادامعا جەتكەن. ۆيرۋستى تۇرمە قىزمەتكەرلەرىنىڭ ءبىرى جۇقتىرعان. ول 14-19 قاڭتار ارالىعىندا ۋحاندا بولعان ەكەن، ءبىراق ونى جاسىرىپ، جۇمىسىن جالعاستىرا بەرگەن. 25 قاڭتاردا اۋرۋ بەلگىلەرى پايدا بولىپ، 4 كۇننەن كەيىن كوروناۆيرۋس انىقتالعان. ماماندار بولمەلەردى دەزينفەكسيالاعانىمەن، تۇتقىنداردىڭ كوبى اۋرۋدى جۇقتىرىپ العان.

قىتايدىڭ شىعىسىنداعى "شاندۋن" پروۆينسياسىندا ورنالاسقان "جەنچەن" تۇرمەسىندە دە كوروناۆيرۋستىڭ بەلگىلەرى تابىلعان. 20 اقپانداعى جاعداي بويىنشا، ۆيرۋستى تۇزەۋ مەكەمەسىندە جازاسىن وتەپ جاتقان 200 سوتتالۋشى مەن قاۋىپسىزدىك قىزمەتىنىڭ 7 قىزمەتكەرى جۇقتىرعان.

سونداي-اق قىتايدىڭ "حۋبەي" تۇرمەسىندە دە ينفەكسيانىڭ 271 وقيعاسى تىركەلگەن. قازىرگى تاڭدا ولاردىڭ اراسىندا قايتىس بولعاندار جوق.

سوڭعى مالىمەتتەر بويىنشا، 20 اقپاندا تاڭەرتەڭ الەمدە كوروناۆيرۋستىڭ جاڭا ءتۇرىن جۇقتىرعانداردىڭ جالپى سانى 75 713 ادامعا جەتكەن، ونىڭ 16 231ء-ى اۋرۋحانالاردان شىعارىلدى،  قايتىس بولعاندار سانى 2126 ادام.