دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپتىڭ ايتۋىنشا، قازاقستاندا كوروناۆيرۋس ينفەكسياسىمەن اۋىراتىن ناۋقاستار تىركەلگەن جوق. بۇل تۋرالى ول وكق-دا وتكەن باسپا ءسوز ءماسليحاتىندا مالىمدەدى. 

– كەيىنگى كەزدە الەۋمەتتىك جەلىلەر مەن WhatsApp مەسسەندجەرىندە كوپتەگەن قاۋەسەت تاراپ ءجۇر. ءبىر وڭىردە نەمەسە قالادا وسىنداي ناۋقاس ادامدى اۋرۋحاناعا جاتقىزىپتى دەگەن اقپارات كوپ. ونداي قاۋەسەتكە سەنبەڭىزدەر. بىزدە تاۋلىگىنە 24 ساعات، اپتاسىنا 7 كۇن ورتالىق جەدەل شتاب قىزمەت ەتەدى. سول سەبەپتى ۇرەي تۋعىزباس ءۇشىن ءبىزدىڭ باسپا ءسوز ورتالىعىنا حابارلاسۋعا بولادى، – دەدى ول.

سونداي-اق ول شىندىققا جاناسپايتىن اقپارات تاراتقاندار اكىمشىلىك جاۋاپكەرشىلىككە تارتىلاتىنىن ايتتى. تۇسىنىسپەۋشىلىك تۋىنداماس ءۇشىن ورتالىق جەدەل شتاب ارقىلى بارلىق رەسمي اقپاراتتى تاراتىپ وتىراتىنىن اتاپ ءوتتى. 

– كوروناۆيرۋس ينفەكسياسىن جۇقتىرعان ناۋقاس بىزدە جوق. باس دارىگەردىڭ قاۋلىسى بويىنشا قىتايدا 6-20 اقپان ارالىعىندا بولعان ازاماتتاردىڭ بارلىعى كارانتينگە جاتقىزىلادى. ياعني، الدىن الۋ شارالارىن كۇشەيتىپ وتىرمىز، – دەدى دياس احمەتشارىپ.