قىزىلوردا قالاسىندا 72 جاستاعى كاسىپكەر، جيھاز كومپانياسى يەسى تىنىمباي بەجەنوۆ جوعالىپ كەتتى، - دەپ جازادى Qamshy.kz اقپارات اگەنتتىگى استانا تەلارناسىنىڭ دەرەگىن نەگىزگە الىپ.
بيزنەسمەن وسىدان 10 كۇن بۇرىن ساعات تاڭعى 5:00-دە كۇندەلىكتى سەرۋەنگە شىعىپ، سول كۇيى ورالماعان. تۋىستارى ادەتتە ۇيدەن تەلەفونسىز شىقپايتىنىن، ءبىراق سول كۇنى تەلەفونىن ۇيگە قالدىرعانىن ايتتى.
"ءدال سول كۇنى تەلەفونسىز، قۇجاتسىز، اقشاسىز شىعىپ كەتتى. پوليسەيلەرمەن اسكەريلەرمەن، كينولوگتارمەن دە، ەرىكتىلەرمەن وسى اۋماقتىڭ بارلىعىن قاراپ شىقتىق،"، - دەيدى كاسىپكەردىڭ تۋىسى.
تۋىستارى كاسىپكەردىڭ دەنساۋلىعى جاقسى بولعانىن ايتتى. تىنىمباي بەجەنوۆ كاسىپتەگى جەكە قيىندىقتار، قاندايدا ءبىر قاۋىپ-قاتەر تۋرالى ەشتەڭە ايتپاعان. جاقىندارىنىڭ ويىنشا، تىنىمباي باجەنوۆتى كولىك قاعىپ كەتىپ، قالانىڭ سىرتىنا الىپ كەتكەن بولۋى مۇمكىن. قازىرگى ۋاقىتتا ىزدەستىرۋ جۇمىستارى جالعاسىپ جاتىر.
پىكىر قالدىرۋ