ءماجىلىس دەپۋتاتى يۋريي تيموششەنكو ءاسكەري بورىشىن وتەپ جۇرگەن قازاقستاندىقتاردىڭ كرەديت تولەۋ مەرزىمىن كەيىنگە شەگەرۋ تۋرالى ۇسىنىس ءبىلدىردى.
دەپۋتاتتىڭ ايتۋىنشا، قازىرگى كەزدە اسكەرگە شاقىرىلۋشىلار اراسىندا كرەديت تولەيتىندەر كوپ. سوندىقتان دا ولار جاقىندارىنا اۋىرتپالىق تۇسىرمەس ءۇشىن اسكەرگە بارماۋعا تىرىسىپ جاتادى. سول سياقتى تولەم مەرزىمىن شەگەرۋدى سۇرايتىندار دا جوق ەمەس دەدى.
– ەگەر شاقىرىلۋشى اسكەرگە اتتانسا، وندا ونىڭ كرەديتى اتا-اناسى مەن تۋىستارىنا بەرىلەدى. سوندىقتان زاڭدا قارىز اتا-انالارعا بەرىلمەۋى كەرەك ەكەنىن نازاردا ۇستاۋىمىز قاجەت. ءبىز اسكەري قىزمەت كەزىندە كرەديت تولەۋ مەرزىمىن ءبىر جىلعا توقتاتا تۇرۋدى ۇسىنامىز، – دەپ ايتتى قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا.
تيموشەنكونىڭ ايتۋىنشا، نەسيەنىڭ بولۋى جانە ونىڭ ۋاقىتىلى تولەنبەۋى نەمەسە ونىڭ تۋىستارىنا ءوتۋى وتان الدىنداعى بورىشىن وتەپ جۇرگەندەردىڭ پسيحوەموسيونالدى جاعدايىنا تەرىس اسەر ەتۋى مۇمكىن دەپ ەسكەرتتى.
پىكىر قالدىرۋ