قازاقستان پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدە كوروناۆيرۋس ينفەكسياسىنىڭ تارالۋىنا قارسى شارالار قارالدى. مامين كوروناۆيرۋسقا بايلانىستى مينيسترلىك وكىلدەرىنە تاپسىرما بەردى. بۇل تۋرالى Primeminister.kz حابارلادى.
"مەملەكەت باسشىسى قاسىم-جومارت كەمەل ۇلى توقايەۆ ۇكىمەتكە حالىقتى كوروناۆيرۋس ينفەكسياسىنان قورعاۋ شارالارىن كۇشەيتۋدى تاپسىردى. الەمدە جاعداي ۋشىعىپ كەتتى. ۆيرۋس 50-دەن استام ەلگە تارالىپ ۇلگەردى جانە وتە بەلسەندى تۇردە تارالۋدا. قازىرگى كەزدە قازاقستاندا كوروناۆيرۋس جۇقتىرعان ادام جوق. سوندىقتان بارلىق الدىن الۋ شارالارىن جالعاستىرۋ قاجەت. ۆيرۋس سونداي-اق الەمدىك ەكونوميكاعا، اتاپ ايتقاندا، ونەركاسىپكە، ترانزيتكە، ساۋدا مەن ەكسپورتقا كەرى اسەرىن تيگىزۋدە. وسىعان بايلانىستى قازاقستان ەكونوميكاسىنىڭ تۇراقتىلىعىن قامتاماسىز ەتۋ ءۇشىن ءتيىستى شارالاردى قابىلداۋ قاجەت" دەدى مامين.
سونداي-اق ۇكىمەت باسشىسى كوروناۆيرۋس تارالعان ەلدەر ءۇشىن ترانزيتتىك، ەلەكتروندىق، تۋريستىك ۆيزالاردى بەرۋدى توقتاتۋ قاجەت ەكەنىن ايتتى.
«يندۋستريا جانە ينفراقۇرىلىمدىق دامۋ مينيسترلىگى كوروناروۆيرۋس بەلسەندى تۇردە تارالىپ جاتقان ەلدەرگە تۇراقتى رەيستەردى شەكتەسىن. سونداي-اق، ءبىزدىڭ فارماسيەۆتيكالىق كاسىپورىنداردا مەديسينالىق ماسكالار مەن باسقا دا قورعانىس قۇرالدارى ءوندىرىسىن ارتتىرۋدى قامتاماسىز ەتۋدى تاپسىرامىن. اكىمدىكتەر مەن ەڭبەك جانە حالىقتى الەۋمەتتىك قورعاۋ مينيسترلىگى كوروناۆيرۋستىق ينفەكسيانىڭ تارالۋ دەڭگەيى قولايسىز ەلدەردىڭ ازاماتتارى ءۇشىن شەتەلدىك جۇمىس كۇشىن تارتۋعا رۇقسات بەرۋدى توقتاتسىن" دەدى ۇكىمەت باسشىسى.
پىكىر قالدىرۋ