دەنساۋلىق ساقتاۋ ءمينيسترى ەلجان ءبىرتانوۆ قايتىس بولعان ادامنىڭ ورگانىن الۋعا جۇبايى نەمەسە جاقىندارى قارسى بولسا، ول ادامنىڭ ورگانى الىنبايتىنىن مالىمدەدى. بۇل تۋرالى sputniknews.kz حابارلادى.

– قايتىس بولعان ادام ءتىرى كەزىندە دونور بولۋعا كەلىسەتىنىن نەمەسە كەلىسپەيتىنىن بىلدىرمەسە، وندا ونىڭ ورگانىن الۋ ءۇشىن جۇبايىنىڭ نەمەسە جاقىن تۋىستارىنىڭ رۇقساتى قاجەت، – دەدى ءبىرتانوۆ. 

ءمينيستردىڭ ايتۋىنشا، قولدانىستاعى زاڭ بويىنشا، ەگەر ادام دونور بولۋدان باس تارتاتىنى تۋرالى ءتىرى كەزىندە ءوتىنىش جازىپ قالدىرىپ كەتپەسە، وندا ولگەننەن كەيىن دارىگەرلەر ونىڭ ورگاندارى مەن تىندەرىن الۋعا قۇقىلى. بۇل رەتتە جۇبايىنىڭ نەمەسە جاقىن تۋىستارىنىڭ پىكىرى ەسكەرىلمەيتىن. ال بۇگىنگى قارالعان جاڭا كودەكستىڭ جوباسىندا كەرىسىنشە تۋىستارىنىڭ رۇقساتىن الۋ نورماسى ەنگىزىلىپ وتىر.

– ءار ادام ەمحاناعا نەمەسە حقكو-عا بارىپ، دونورلىقتان باس تارتاتىنىن بىلدىرە الادى. ەگەر ءسىز باس تارتساڭىز، وندا پوتەنسيالدى دونورلاردىڭ تىزىمىنە ەنگىزىلمەيسىز. ءبىراق، ەگەر تىزىمدە ەشتەڭە جازىلماسا، ياعني ادام ءتىرى كەزىندە دونور بولۋعا كەلىسەتىنىن نەمەسە كەلىسپەيتىنىن ايتىپ كەتپەسە، وندا تۋىسقاندارىنىڭ رۇقساتىن سۇراۋ كەرەك. ەگەر جۇبايى نەمەسە جاقىندارى قارسى بولسا، ول ادامنىڭ ورگانى الىنبايدى. ەگەر تۋىستارى كەلىسسە، وندا بۇل قايتىس بولعان ادام كوزى تىرىسىندە دونورلىققا قارسى بولماعانىن بىلدىرەدى، – دەدى دەنساۋلىق ساقتاۋ ءمينيسترى. 

ءبىرتانوۆ ولگەننەن كەيىن ورگاندارىن الۋعا رۇقسات بەرگەن قازاقستاندىقتار تۋرالى اقپارات قۇپيا ەكەنىن اتاپ ءوتتى.

– ول ادامنىڭ قان توبى، گەنەتيكالىق سايكەستىگى قانداي ەكەنىن، كىمگە دونور بولاتىنىن دارىگەر بىلمەيدى. ول تەك حابار بەرەدى. ارنايى ترانسپلانتولوگ-كوورديناتور كەلىپ، دونور بولۋعا جاراي ما، جوق پا، سول ايتادى، – دەدى ەلجان ءبىرتانوۆ.

سونىمەن قاتار، زاڭ جوباسىندا قازاقستاننان اعزالار مەن تىندەردى شىعارۋ مۇمكىندىگى شەكتەلىپ وتىر. تەك شەت ەلدە ەم الىپ جاتقان قازاقستاندىقتار ءۇشىن عانا شىعارۋعا رۇقسات ەتىلەدى.

ءماجىلىس دەپۋتاتتارى زاڭ جوباسىن ءبىرىنشى وقىلىمدا ماقۇلدادى.