قازاقستاندىق دەپۋتاتتار 8 ناۋرىز مەرەكەسىندە سۇيىكتى جارلارىنا قانداي سىيلىق تارتۋ ەتەتىنىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

حالىق قالاۋلىلارى سۇيىكتىلەرىنە حالىقارالىق ايەلدەر كۇنىندە سىيلىق جاساۋ ءۇشىن كوپ قينالمايتىن ءتارىزدى. دەنى نازىك جانداردىڭ جاقسى كورەتىن گۇل شوقتارىن تارتۋ ەتپەك.

"ەڭ ۇلكەن سىيلىق، ول، ارينە، گۇل. ەكىنشىسى، ءوزىمىزدىڭ جۇرەگىمىزدى سىيلاۋ، جاقسى كوڭىل-كۇيىمىزدى سىيلاۋ. مەنىڭ جارىم كەزىندە مەنىمەن بىرگە وقىعان سىنىپتاسىم، ءومىر بويى قاسىمدا كەلە جاتقان كىسى. وعان ەندى تەك 8 ناۋرىزدا عانا ەمەس، كۇن سايىن جاقسىلىق سىيلاپ كەلە جاتىرمىن دەپ ويلايمىن. كوڭىل-كۇيىم جاقسى بولعان كەزدىڭ بارىندە گۇل سىيلايمىن"، - دەدى سەنات دەپۋتاتى بەكتاس بەكنازاروۆ.

ونىڭ ارىپتەسى مۇرات باقتيار ۇلى دا جىلداعى ادەتپەن جارىنا گۇل سىيلاماقشى.

"ودان كەيىن جاقسى كورەتىن تورتى بار، سونى الىپ بەرەمىن. قىزدارىما كوپ جاعدايدا تورت نەمەسە كامپيت بەرەمىن. جالپى، وزدەرىنىڭ قالاعانىن ساتىپ الۋعا تىرىسامىن"، - دەدى ول.

ال ءماجىلىس دەپۋتاتى بەكبولات تىلەۋحان 8 ناۋرىزعا الاتىن سىيلىعىن ءدۇيىم جۇرتقا جاريا ەتكىسى كەلمەيتىنىن ءبىلدىردى.

"ول ەندى مەنىڭ ىشكى سىرىم، ايتپايمىن، ايتۋعا ۇيالامىن. وزىنە قاجەت نارسەسىن سىيلايمىن"، - دەدى ول.

دەسە دە ماجىلىسمەن ءۇش ايەلىنە ءارتۇرلى سىيلىق تارتۋ ەتپەكشى.

"ءارتۇرلى بولادى، نە قالايتىنىنا بايلانىستى"، - دەپ قىسقا قايىردى تىلەۋحان.

تومەنگى پالاتا دەپۋتاتى باقىتبەك سماعۇل سىيلىق بەرگەندى اسا ۇناتا قويمايتىن سىڭايلى.

"جالپى، مەن وعان ماشىقتانبايمىن. ەر ازاماتتىڭ ءوزى ايەلدىڭ كوڭىلىنەن شىعىپ تۇرسا، ۇلكەن سىيلىق سول عوي. بۇل مەرەكەنىڭ ءمانى تەك سىيلىق بەرۋدە عانا ەمەس، ايەلدى سىيلاي بىلۋدە دەپ ويلايمىن. ايەل زاتىنا دەگەن قۇرمەتىمىز سەيىلمەۋگە ءتيىستى"، - دەدى ول.