ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا قازاقستان رەسپۋبليكاسىنىڭ 2020 جىلعى قاڭتار-اقپانداعى الەۋمەتتىك-ەكونوميكالىق دامۋىنىڭ قورىتىندىسى جانە رەسپۋبليكالىق بيۋدجەتتىڭ اتقارىلۋى قارالدى.

ەكونوميكانىڭ، بانك سالاسىنىڭ جاي-كۇيى، رەسپۋبليكالىق بيۋدجەتتىڭ ورىندالۋى، مەملەكەتتىك ساتىپ الۋداعى جەرگىلىكتى قامتۋ تۋرالى ق ر ۇلتتىق ەكونوميكا ءمينيسترى ر. دالەنوۆ، ۇلتتىق بانك ءتوراعاسى ە. دوسايەۆ، پرەمەر-مينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ، ەڭبەك نارىعىنداعى جاعداي جانە ينفراقۇرىلىمدىق جوبالاردى ىسكە اسىرۋ تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ب. نۇرىمبەتوۆ، سونداي-اق يندۋستريا جانە ينفراقۇرىلىمدىق دامۋ ءبىرىنشى ۆيسە-مينيسترى ق. وسكەنبايەۆ باياندادى.

وسى جىلدىڭ قاڭتار-اقپانىندا ءجىو ءوسىمى 2019 جىلدىڭ سايكەس كەزەڭىنە قاراعاندا 3،3% قۇرادى. نەگىزگى كاپيتالعا سالىنعان ينۆەستيسيالار 11،6%-عا، ونىڭ ىشىندە جەكە ينۆەستيسيالار 12،1%-عا ءوستى. ينفلياسيا 6% ماقساتتى دالىزدە ساقتالادى.

ەكونوميكانىڭ شيكىزاتتىق ەمەس سالالارى، ونىڭ ىشىندە اۆتوموبيل جاساۋدى (72،2%) جانە جەڭىل ونەركاسىپتى (12،4%) قوسا العاندا، وڭدەۋشى ونەركاسىپ – 9،4%-عا، قۇرىلىس – 11،9%-عا ءوسىم كورسەتتى.  ۇلتتىق قور اكتيۆتەرى $61،1 ملرد، التىن-ۆاليۋتا رەزەرۆتەرى $29،3 ملرد قۇرادى.

«بۇگىنگى تاڭدا سىرتقى ەكونوميكالىق كونيۋنكتۋرادا تەرىس ديناميكا بايقالىپ وتىر. ءبىرقاتار ءىرى حالىقارالىق قارجى ۇيىمدارى مەن دامۋ ينستيتۋتتارى بيىل الەمدىك ەكونوميكانىڭ ءوسۋ بولجامدارىنىڭ تومەندەگەنىن حابارلادى. ەنەرگيا تاسىمالداۋشىلارعا باعانىڭ تومەندەۋىنىڭ اسەرى وپەك-تىڭ نارىقتى تۇراقتاندىرۋ بويىنشا ۇيلەستىرىلگەن شارالاردى ىسكە اسىرۋعا قاتىستى كەلىسىمگە كەلە الماۋى اياسىندا كۇشەيە ءتۇستى»، – دەدى ا. مامين.

پرەمەر-مينيستر مەملەكەت باسشىسى جەدەل ارەكەت ەتۋ رەسپۋبليكالىق شتابىن قۇرعانىن اتاپ ءوتتى. ءتيىستى شتابتار بارلىق وڭىرلەردە قۇرىلعان. ۇكىمەت جاعدايدى ودان ءارى دامىتۋدىڭ بىرنەشە نۇسقالارىن پىسىقتادى، ولاردىڭ ءارقايسىسى قاجەتتى رەسۋرستارمەن، ونىڭ ىشىندە قارجىلىق رەسۋرستارمەن قامتاماسىز ەتىلگەن. ۇلتتىق ەكونوميكاعا تەرىس سىرتقى كونيۋنكتۋرادان اسەرلەردى ازايتۋعا باعىتتالعان ءبىرقاتار شارالار ازىرلەندى.

«اتالعان شارالاردىڭ نەگىزگى ماقساتى – حالىقتىڭ ءال-اۋقاتىنىڭ ساقتالۋىن قامتاماسىز ەتۋ. ازاماتتارىمىزدىڭ ەشقايسىسى قيىن جاعدايدا قالمايدى»، – دەدى ا. مامين.

ۇكىمەت باسشىسى اكىمدىكتەرگە الەۋمەتتىك ماڭىزى بار تاۋارلار بويىنشا نارىقتاردا تاۋار ينتەرۆەنسيالارىن وتكىزۋ ءۇشىن تۇراقتاندىرۋ قورلارىنىڭ ءتيىمدى جۇمىسىن قامتاماسىز ەتۋدى تاپسىردى.

«ءبىز وتاندىق كاسىپورىنداردىڭ تاۋارلارى مەن قىزمەتتەرىنە سۇرانىستى ىنتالاندىرۋ بويىنشا قولدا بار بارلىق ىشكى رەزەرۆتەردى ىسكە قوسۋىمىز كەرەك»، – دەپ پرەمەر-مينيستر، يمپورتتى الماستىرۋدى كۇشەيتۋ جونىندەگى ناقتى شارالارمەن جوسپار ازىرلەۋدى تاپسىردى.

پرەمەر-مينيستر «سامۇرىق-قازىنا» ءۇاق» اق-عا، ۇلتتىق باسقارۋشى حولدينگتەرگە جانە ۇكىمەتكە ەسەپ بەرەتىن باسقا دا ۇيىمدارعا ۆاليۋتا نارىعىنداعى ءوز وپەراسيالارىن ۇلتتىق بانكپەن كەلىسۋدى تاپسىردى.

قارجى مينيسترلىگىنە مەملەكەتتىك ورگاندارمەن بىرلەسىپ، ءبىر اپتا مەرزىمدە باسىم ەمەس ينۆەستيسيالىق جوبالاردى ىسكە اسىرۋ مەرزىمىن اۋىستىرا وتىرىپ، بيۋدجەتتىك شىعىستاردىڭ باسىمدىقتارىن قايتا قاراۋ جونىندە ۇسىنىستار ەنگىزۋ تاپسىرىلدى.

ۇكىمەت باسشىسى ەڭبەك جانە حالىقتى الەۋمەتتىك قورعاۋ مينيسترلىگىنە ۋاقىتىلى الەۋمەتتىك تولەمدەردى تولىق كولەمدە قامتاماسىز ەتۋگە جانە جۇمىسپەن قامتۋدىڭ جاڭا جول كارتاسىن ازىرلەۋگە تاپسىرما بەردى، ونىڭ اياسىندا ينفراقۇرىلىمدىق جوبالاردى ىسكە اسىرۋ، الەۋمەتتىك نىسانداردى جوندەۋ جانە ەلدى مەكەندەردى اباتتاندىرۋ جونىندەگى جۇمىستى كۇشەيتۋ، سونداي-اق اكىمدىكتەرمەن بىرلەسىپ ازاماتتاردىڭ ەڭبەك قۇقىقتارىنىڭ ساقتالۋىنا قاتاڭ باقىلاۋدى قامتاماسىز ەتۋ تاپسىرىلدى.

«ءبىزدىڭ ورتاق مىندەتىمىز – الەۋمەتتىك تۇراقتىلىقتى قامتاماسىز ەتۋ جانە جۇمىسپەن قامتۋ. ارەكەت ەتىپ تۇرعان جۇمىس ورىندارىن ساقتاۋعا جانە جاڭا جۇمىس ورىندارىن قۇرۋعا ەرەكشە نازار اۋدارۋ قاجەت. مەملەكەتتىڭ بارلىق الەۋمەتتىك مىندەتتەمەلەرى ورىندالاتىنىن اتاپ وتكىم كەلەدى. بارلىق زەينەتاقى مەن جاردەماقى ۋاقىتىلى ءارى تولىق كولەمدە تولەنەدى»، – دەپ تۇيىندەدى  ا. مامين.