«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ساياسي ۇيىمنىڭ ايماقتاردى ارالاۋ جوسپارىنىڭ اياسىندا جامبىل وبلىسىنا ارنايى جۇمىس ساپارىمەن كەلىپ، ءوڭىردىڭ جۋالى اۋدانى مەن تاراز قالاسىندا بولىپ، ءوڭىردىڭ كاسىپكەر ايەلدەرىمەن، زيالى تۇلعالارىمەن، ەتنو-مادەني بىرلەستىكتەر وكىلدەرىمەن جانە ءبىلىم سالاسىنىڭ قىزمەتكەرلەرىمەن كەزدەستى.

زيالىلارمەن بولعان كەزدەسۋدى وبلىس اكىمى بەردىبەك ساپاربايەۆ اشىپ، جۇرگىزىپ وتىردى. باۋىرجان بايبەك زيالى قاۋىم وكىلدەرىمەن ەمەن-جارقىن سۇحبات قۇرىپ، ساپاردىڭ ماقساتى، ەل جايى، ساياسات بارىسى، يدەولوگيالىق جۇمىستار باعدارى، رۋحانيات پەن مادەني احۋال، جاستار تاربيەسى سەكىلدى كەلەلى جايتتەرگە كەڭىنەن توقتالدى. اسىرەسە، ەلباسى باستاماسىمەن پارتيا تاراپىنان ەنگىزىلىپ جاتقان جاڭالىقتار – پرايمەريز بەن وڭىرلىك دامۋ باعدارلامالارى، پارتيانىڭ نەگىزگى قۇندىلىقتارى مەن الداعى مىندەتتەرى تۋرالى جان-جاقتى ايتىپ بەردى.

«وزدەرىڭىز بىلەسىزدەر، جىلدىڭ باسىنان باستاپ ەلباسى تاپسىرماسىمەن وڭىرلەردى ارالاي باستادىق. مۇنداعى ماقساتىمىز – جەرگىلىكتى جەرلەردە بولىپ، تۇرعىندارمەن، زيالىلارمەن، ەل اعالارىمەن كەزدەسۋ، پىكىرلەرىن ءبىلىپ، ۇسىنىستارىن تىڭداپ، تۇيتكىلدى ماسەلەلەردى بىرلەسە تالقىلاۋ، شەشۋ جولدارىن قاراستىرۋ. ەلباسى ايتقانداي، پارتيانىڭ ءۇش ماقساتى بار. ول، بىرىنشىدەن، حالىقتىڭ پىكىرىن ءبىلۋ، حالىقتىڭ ءسوزىن سويلەۋ، ونى بيلىككە جەتكىزۋ. ەكىنشىدەن، بيلىك تاراپىنان جاسالىپ جاتقان دۇنيەلەردى حالىققا قاراپايىم تىلمەن ءتۇسىندىرىپ ايتۋ. ۇشىنشىدەن، ءبىلىم مەن دەنساۋلىق سالاسىنىڭ ساپاسىنا ءمان بەرۋ.
ءبىزدىڭ ساياسي ۇستانىمىمىز – سەنتريزم. ول – ورتا جولمەن ءجۇرۋ، وڭعا،سولعا تارتپاۋ. ءبىزدىڭ نەگىزگى قۇندىلىقتارىمىز – ادام، ونىڭ بوستاندىعى، تاۋەلسىزدىك، ىنتىماقشىلدىق، وتباسى، ءداستۇر، رۋحانيات جانە زاڭنىڭ ۇستەمدىگى. ەڭ باستىسى، ءبىز قابىلدانعان زاڭداردى ورىنداۋىمىز كەرەك.
پارتيا ەلىمىزدەگى پروبلەمالاردى ءبىلىپ قانا قويماي، ولاردى شەشۋ ءۇشىن قاجەتتى قادامدار جاساماق. ولاردىڭ ءبىرىنشىسى – پرايمەريز، ياعني ىشكى پارتيالىق ىرىكتەۋ وتكىزۋ ارقىلى قولىنان ءىس كەلەتىن، ءبىلىمدى، ەلگە ءسوزى ءوتىمدى، ادال دا ابىرويلى ازاماتتاردىڭ بيلىككە، وكىلەتتى ورگاندارعا كەلۋىنە ىقپال ەتۋ بولسا، ەكىنشىسى – ءاربىر ءوڭىردىڭ ەرەكشەلىكتەرىن، ناقتى قاجەتتىلىكتەرىن ەسكەرە وتىرىپ، ارنايى دامۋ باعدارلاماسىن ازىرلەۋ. سوندىقتان ءقازىر بەس جىلدىق وسىنداي باعدارلامالاردى تالقىلاپ جاتىرمىز»، - دەدى باۋىرجان بايبەك.

زيالى قاۋىم وكىلدەرى دە وزدەرىن تولعاندىرىپ جۇرگەن ساۋالدارىن قويىپ، ۇسىنىستارى مەن ويلارىن بۇكپەسىز ورتاعا سالدى. جيىنعا قاتىسۋشىلار تاراپىنان العاش بولىپ ءسوز العان ماسات بەرىك ەلدىڭ تاۋەلسىزدىك العانىنا 30 جىلعا جۋىق ۋاقىت بولسا دا مەملەكەتتىك ءتىلدىڭ ءوز دەڭگەيىندە پايدالانىلماي كەلە جاتقانىنا الاڭداۋشىلىعىن ءبىلدىرىپ، ءتىل تۋرالى زاڭ مەن ءتىلدى دامىتۋعا ارنالعان مەملەكەتتىك باعدارلامانىڭ ورىندالۋىنا باسا ءمان بەرۋدى، پارتيا تاراپىنان باقىلاۋدى قولعا الۋدى ۇسىندى. ال ارداگەر ۇستاز باتەس ەگەمبەردييەۆا جۋىردا قابىلدانعان «پەداگوگ مارتەبەسى تۋرالى» زاڭ جايىندا اڭگىمە ءوربىتىپ، ءبىلىم سالاسىن دامىتۋ تۋرالى ويلارىمەن ءبولىستى. سونداي-اق «جامبىل وبلىستىق م.قاشعاري اتىنداعى ۇيعىر ەتنو-مادەني بىرلەستىگى» قوعامدىق بىرلەستىگىنىڭ ءتورايىمى مۋحاببات تۇردييەۆا ءپاتريوتيزمدى ناسيحاتتاۋ، بارشا ۇلت وكىلدەرىنىڭ مەملەكەتتىك ءتىلدى مەڭگەرۋى، ەل حالقىنىڭ تۇراقتىلىعى مەن بىرلىگىن نىعايتۋ، ەتنوسارالىق قاتىناستاردى ۇيلەستىرۋ جايىن قوزعاسا، ش.مۇرتازا اتىنداعى «رۋحانيات جانە تاريحتانۋ» ورتالىعى ديرەكتورىنىڭ ورىنباسارى احمەتجان وزبەكوۆ قازاقتىڭ ءتول ونەرى – ايتىسقا توقتالىپ، پارتيا قولداۋىمەن وتكىزىلىپ جاتقان ايتىستاردى تەلەارنالاردان كورسەتۋ، ايتىسكەرلەرگە پارتيا تاراپىنان جۇيەلى تۇردە كەڭەستەر بەرىلىپ وتىرسا دەگەن ۇسىنىسىن جەتكىزدى.
سونىمەن بىرگە باس قوسۋدا تاياۋدا ورىن العان قورداي وقيعاسى دا ءسوز بولىپ، ەندى وسىنداي كەلەڭسىزدىكتەردى بولدىرماۋدىڭ الدىن الۋ شارالارى پىسىقتالدى.
پارتيا ءتوراعاسىنىڭ ءبىرىنشى ورىنباسارى جۇرتشىلىق كوتەرىپ وتىرعان ماسەلەلەردىڭ بارلىعى ازىرلەنىپ جاتقان ءوڭىردى دامىتۋدىڭ 5 جىلدىق باعدارلاماسىنا ەنەتىنىن، ال وسى ساپار بارىسىندا قوردايعا ارنايى بارىپ، جەرگىلىكتى جاعدايمەن تانىساتىنىن جەتكىزدى. ونىڭ ايتۋىنشا، حالىقتىڭ اۋىزبىرشىلىگى مەن قوعامدىق كەلىسىم عانا – ەلىمىزدىڭ وسىپ-وركەندەۋى مەن تابىستى دامۋىنىڭ بەرىك نەگىزى.
ساپار اياسىندا پارتيانىڭ كەزەكتەن تىس كونفەرەنسياسى ءوتىپ، ونىڭ قورىتىندىسى بويىنشا وبلىسقا جۋىردا اكىم بولىپ تاعايىندالعان بەردىبەك ساپاربايەۆ «Nur Otan» پارتياسى جامبىل وبلىستىق فيليالىنىڭ ءتوراعاسى بولىپ سايلاندى.

ەسكە سالا كەتەيىك، تاياۋدا، ياعني 5 ناۋرىزدا ەلباسىنىڭ توراعالىعىمەن وتكەن «Nur Otan» پارتياسىنىڭ ساياسي كەڭەسى بيۋروسىنىڭ وتىرىسىندا 30 ناۋرىزدان 16 مامىرعا دەيىن ەلىمىزدە اشىق ىشكى پارتيالىق ىرىكتەۋ - پرايمەريز وتكىزۋ تۋرالى شەشىم قابىلداندى.