وسى اپتا ەلىمىز ءۇشىن وڭاي بولعان جوق. مۇناي باعاسى كۇرت قۇلدىراپ، الەمدىك ەكونوميكا اۋىر سوققى الدى. ونىڭ زاردابى بىزگە دە ءتيدى. قازاقستاندا جاھان جۇرتىن دۇرلىكتىرگەن كوروناۆيرۋس ىندەتى تىركەلىپ، دەرتتى جۇقتىرعاندار تابىلدى.⠀
⠀
دەگەنمەن، دۇربەلەڭ تۋعىزىپ، اۋرە-سارساڭعا سالىنۋعا ەش نەگىز جوق. مەملەكەت باسشىسى ەلدىڭ ەكونوميكالىق احۋالىن رەتتەۋ ءۇشىن كەڭەس وتكىزىپ، ءتيىستى ورگاندارعا ناقتى تاپسىرمالار بەردى. سوعان سايكەس، ءبىرقاتار ءتيىستى شەشىم قابىلداندى. ەڭ باستىسى، مەملەكەت بارلىق الەۋمەتتىك مىندەتتەمەلەرىن ورىنداۋدى توقتاتپايدى.⠀
⠀
ىندەتتىڭ كەڭ كولەمدە تارالماۋى ءۇشىن قاجەتتى جۇمىستار قولعا الىندى. شۇعىل ارەكەت ەتۋ شتابى قۇرىلىپ، ءتيىستى شارالار كۇشەيتىلدى. بارلىق ىس-ارەكەت پرەزيدەنتتىڭ تىكەلەي باقىلاۋىندا. وسى ورايدا بۇل كەزەڭنەن سۇرىنبەي وتۋگە ءارقايسىمىز جاۋاپتى ەكەنىمىزدى ەرەكشە اتاپ وتكىم كەلەدى. سوندىقتان ءوزىمىزدى، وتباسىمىزدى، ورتامىزدى قورعاۋ ءۇشىن قابىلدانعان شەكتەۋلەردى دۇرىس ءتۇسىنىپ، باستى نازاردا ۇستايىق.⠀
⠀
ءبىز بۇدان دا قيىن كەزەڭدەردى باستان وتكەرىپ، سان ءتۇرلى زاۋالدى ەڭسەرگەن حالىقپىز. سونىڭ بارىندە بەكەم بىرلىك پەن بەرەكەلى تىرلىكتىڭ ەرەن ۇلگىسىن كورسەتتىك. بۇل جولى دا ءدال سولاي بولارىنا سەنىمدىمىن جانە بۇگىنگى امال مەرەكەسىندە سونى تىلەيمىن!⠀
⠀
وسى رەتتە بارشاڭىزدى ىنتىماققا شاقىرىپ، ىزگىلىككە ۇندەيتىن مەرەكەمەن شىن جۇرەكتەن قۇتتىقتايمىن! ءاز-ناۋرىزدىڭ جارشىسىنداي بولعان مەيرام ءار شاڭىراققا شاتتىق پەن قۋانىش اكەلسىن! قازاق ەلى قاۋىپ-قاتەردەن امان بولىپ، ماڭگى جاساسىن!
ماۋلەن اشىمبايەۆ
پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى
Facebook پاراقشاسىنان
پىكىر قالدىرۋ