بۇگىن، 15 ناۋرىزدا قازاقستان پرەزيدەنتى قاسىم-جومارت توقايەۆ كوروناۆيرۋسقا بايلانىستى ەل اۋماعانىدا توتەنشە جاعداي ەنگىزۋ تۋرالى جارلىققا قول قويدى. بۇل تۋرالى اقوردا سايتى حابارلادى. 

اقوردا تاراتقان توقايەۆتىڭ جارلىعىندا توتەنشە جاعداي 16 ناۋرىز ساعات تاڭعى 8.00-دەن باستالىپ 15 ساۋىرگە دەيىن جالعاساتىنى جازىلعان. 

"دۇنيەجۇزىلىك دەنساۋلىق ساقتاۋ ۇيىمىنىڭ جاڭا COVID-19 كوروناۆيرۋسىن پاندەميا دەپ جاريالاۋىنا بايلانىستى ازاماتتاردىڭ ءومىرى مەن دەنساۋلىعىن قورعاۋ ماقساتىندا قازاقستان رەسپۋبليكاسىنىڭ بارلىق اۋماعىندا  2020  جىلعى  16  ناۋرىزداعى   08  ساعات 00 مينۋت پەن 2020 جىلعى 15 ساۋىردەگى 07 ساعات 00 مينۋت كەزەڭىندە توتەنشە جاعداي ەنگىزىلسىن" دەلىنگەن پرەزيدەنت جارلىعىندا. 

جارلىققا سايكەس، ءىرى ساۋدا وبەكتىلەرىنىڭ جۇمىس ىستەۋىنە، ساۋدا ويىن-ساۋىق ورتالىقتارىنىڭ، كينوتەاترلاردىڭ، تەاترلاردىڭ، كورمەلەردىڭ جانە ادامدار كوپ جينالاتىن باسقا دا وبەكتىلەردىڭ قىزمەتىن توقتاتىلماق. بۇعان قوسا، ويىن-ساۋىق،  سپورتتىق  جانە باسقا دا بۇقارالىق ءىس-شارالاردى، سونداي-اق  وتباسىلىق،  ءسالت-داستۇر ءىس-شارالارىن وتكىزۋگە تىيىم سالىنادى. قازاقستان اۋماعىنا كولىكتىڭ بارلىق تۇرىمەن كىرىپ-شىعۋعا شەكتەۋلەر بەلگىلەندى. (قازاقستان مەن وزگە مەملەكەتتىڭ ديپلوماتيالىق قىزمەت وكىلدەرى، حالىقارالىق دەلەگاتتارعا بۇل شەكتەۋدىڭ قاتىسى جوق).

قازاقستان دەنساۋلىق ساقتاۋ مينيسترلىگىنىڭ سوڭعى دەرگىنشە، ەل اۋماعىندا 8 ادامنان كوروناۆيرۋس تابىلعان.