الماتى قالالىق قوعامدىق دەنساۋلىق باسقارماسىنىڭ جەتەكشىسى تىلەۋحان ابىلدايەۆتىڭ مالىمدەۋىنشە، الماتىدا بۇگىن 7 ادامنان ءقاۋىپتى ۆيرۋس تابىلدى. ونىڭ ىشىندە كوروناۆيرۋس ينفەكسياسىن جۇقتىرعان 2 جاسار ءبۇلدىرشىن دە بار. ول كۋرشيەۆەل – بەرلين – الماتى چارتەرلىك رەيسىمەن ۇشىپ كەلگەن. 13 ناۋرىزدا كارانتينگە جاتقىزىلعان 12 ادامنىڭ ءبىرى ەكەن. بۇل تۋرالى 24.kz حابارلادى.

الماتىدا كوروناۆيرۋسپەن اۋرۋحاناعا تۇسكەندەردىڭ سانى 15 ادامعا جەتتى. ەكەۋى بۇعان دەيىن كوروناۆيرۋسى راستالعان اداممەن بايلانىستا بولعاندار. ولار دا كارانتيندە جاتقان ەكەن. بارلىق ناۋقاستىڭ جاعدايى قاناعاتتانارلىق. جالپى الماتىدا 729 ادام ستاسيونارلىق، ال 760 ادام ءۇي كارانتينىندە جاتىر. ال، كەشە 1986 جىلى تۋعان ستامبۋل – الماتى رەيسىمەن كەلگەن قىزدان كوروناۆيرۋس ينفەكسياسى انىقتالعان ەدى. قالانىڭ باس دارىگەرى ول قىزدىڭ نەلىكتەن كارانتينگە ورنالاستىرىلماعانىن ءتۇسىندىردى.

– بۇل قىز ەشبىر ساناتقا كىرمەيتىن ەلدەن ۇشىپ كەلگەندىكتەن، ۇيدەگى كارانتينگە ورنالاستىرىلماعان. كەشە ونىڭ زەرتحانالىق تالداۋلارى راستالدى. وسىلايشا، ول قالانىڭ ينفەكسيالىق ستاسيونارىنا ەمدەۋگە جاتقىزىلدى. بۇگىندە ونىمەن قاتىناستا بولعان بارلىق ادامدار تابىلىپ پروۆيزورلىق ستاسيونارعا كارانتينگە ورنالاستىرىلدى، – دەدى ابىلدايەۆ.