كوروناۆيرۋستىڭ ورشۋىنە بايلانىستى شەتەلدە وقىپ جاتقان ستۋدەنتتەر وزدەرىنىڭ جانايقايلارىن الەۋمەتتىك جەلى ارقىلى ءبىلدىرىپ، حالىقتان كومەك سۇرادى. بۇل تۋرالى ءىnstagram پاراقشاسىندا جاريالادى.
– بىزگە بولىپ جاتقان وقيعالاردى قابىلداۋ قيىن. ءبىز، قازاقستان رەسپۋبليكاسىنىڭ ازاماتتارى، ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتىنىڭ 2-كۋرس ستۋدەنتتەرىمىز. اكادەميالىق ۇشقىرلىق باعدارلاماسى بويىنشا ءبىزدىڭ وقۋ ورنىمىز ءبىزدى يسپانيادان سيۋداد-رەال قالاسىنا جارتى جىل، ياعني قاڭتار-ماۋسىم ارالىعىندا وقۋعا جىبەرگەن بولاتىن، – دەدى قازاقستاندىق ستۋدەنت.
ولار يسپانيادا COVID-19 ۆيرۋسىنىڭ تارالۋىنا بايلانىستى قازاقستان ەلشىلىگىنە جانە ەلدەگى وقۋ ورىندارىنا حات جىبەرگەن. ستۋدەنتتەر ەشقانداي جاۋاپ الا الماعاندىقتان، ق ر ىشكى ىستەر مينيسترلىگىنە ۇندەۋ جاريالاعان.
– يسپانيانىڭ بارلىق توڭىرەگىندە كارانتين جاريالانعان. قالادا قوزعالىستىڭ بارلىعىنا شەكتەۋ قويىلدى. ەگەردە ازاماتتار شەكتەۋدى بۇزاتىن بولسا، جاۋاپكەرشىلىككە تارتىلادى. كۇن سايىن مەملەكەتتەر يسپانيادان ءوز رەيستەرىن كەرى قايتارىپ جاتىر. ەلگە باسقا مەملەكەتتەن ازاماتتار ۇشىپ كەلە المايدى. ءبىزدى ونىمەن قوسا بۇل جاقتا مازاقتاپ، "ازيالىقتار" دەپ كەمسىتىپ، شەتتەتەدى. بىزگە دۇكەننەن نان ساتپايدى. بىزگە "ازيالىقسىڭدار"، "كوروناۆيرۋس سەندەردەن تارالدى" دەپ ساۋساقتارىن شوشايتا قارايدى. ۇلكەندەر بىزگە جۇمىرتقا لاقتىرسا، بالالار ادەپسىز قىلىقتارمەن مازاقتايدى. ءبىزدىڭ پسيحيكامىز ابدەن بۇزىلدى. باستاپقىدا كوشەگە شىعۋعا قورقاتىنبىز، ال ەندى ۇيىقتاۋعا قورقامىز، – دەدى قازاقستاندىق ستۋدەنت.
ستۋدەنتتەردىڭ ايتۋىنشا، يسپانيا بيلىگى كارانتيندى 2 ايعا سوزۋى مۇمكىن. سەبەبى اۋرۋدى جۇقتىرعاندار سانى 10 مىڭنان اسىپ كەتكەن. ستۋدەنت جاستاردىڭ ەندى تۇراتىن جەرى جوق. ءۇي يەسى كارانتيندە بولعاندىقتان، جالعا بەرگەن پاتەردىڭ اقشاسىن الا المايمىن دەپ وسى ايدىڭ سوڭىنا دەيىن تۇرۋعا رۇقسات بەرىپتى.
– ءبىز ماسەلەنى اياعىنا دەيىن كۇتىپ، ۋشىقتىرماۋعا تىرىستىق. الايدا بولىپ جاتقان دۇنيەلەر وتە قورقىنىشتى. ءبىز ءوز ءومىرىمىز ءۇشىن قورقامىز. سىزدەردەن بىزگە كومەكتەسە الاتىن بيلىك باسىنداعى ادامداردى بەلگىلەۋلەرىڭىزدى سۇرايمىز. بارىنشا رەپوست جاساپ، تاراتساڭىزدار، – دەپ شەتەلدە وقىپ جاتقان ستۋدەنت كومەككە مۇقتاجدىعىن جەتكىزدى.
پىكىر قالدىرۋ