ءبىلىم جانە عىلىم مينيسترلىگىنىڭ تاپسىرماسى بويىنشا ۇلتتىق بيوتەحنولوگيا ورتالىعى مەن بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى COVID19 كوروناۆيرۋسىنا قارسى ۆاكسينا جاساۋ بويىنشا بىرلەسكەن جۇمىستى باستادى. بۇل تۋرالى coronavirus2020.kz حابارلادى.
قاڭتار ايىنىڭ سوڭىندا ۇلتتىق بيوتەحنولوگيا ورتالىعىنىڭ عالىمدارى 6 كۇن ىشىندە COVID-19 كوروناۆيرۋس اۋرۋىن جەدەل انىقتاۋعا مۇمكىندىك بەرەتىن سەنىمدى جوعارى سەزىمتال تەست-جۇيەسىن ازىرلەدى. قازاقستاندىق تەست-جۇيەنىڭ تيىمدىلىگى مەن جوعارى سەزىمتالدىعى رەسەي جانە جۇڭگو دياگنوستيكۋمدارىمەن سالىستىرعاندا راستالدى.
ۆاكسينانى ازىرلەۋ باعدارلاماسى شەڭبەرىندە ەڭ وزىق بيوتەحنولوگيالىق جانە گەندىك-ينجەنەرلىك ادىستەردى پايدالانىپ 5 كانديداتتىق ۆاكسينا جاسالاتىن بولادى. مۇنداي تەحنولوگيالاردى الەمدەگى ۆاكسينا ءوندىرۋ سالاسىنداعى كوشباسشى كاسىپورىندار پايدالانادى. كانديداتتىق ۆاكسينالاردىڭ 5 تۇرىنەن كلينيكالىق سىناقتار جۇرگىزۋ ءۇشىن نەعۇرلىم ءتيىمدى جانە تەحنولوگيالىق ۆاكسينا تاڭدالادى.
الەمنىڭ كوپتەگەن ەلدەرى دە ءوز ۆاكسيناسىن ازىرلەيتىنىن جاريالادى. الايدا ولاردىڭ بارلىعى كلينيكالىق سىناقتاردى تالاپ ەتەدى، سوندىقتان ءبىر جىلدان كەم ەمەس ۋاقىتتى تالاپ ەتەدى. ۆاكسينا جاسالعانعا دەيىن COVID19 ۆيرۋسىنىڭ تەز جانە جاپپاي تارالۋىنا جول بەرمەۋ كەرەك. بۇل مەملەكەت قابىلداعان شارالارعا عانا ەمەس، ءاربىر ادامعا دا بايلانىستى. سوندىقتان اۋرۋدى الدىن الۋدىڭ بارلىق شارتتارىن ورىنداۋ قاجەت.
پىكىر قالدىرۋ