قازاقستاننىڭ دەنساۋلىق ساقتاۋ مينيسترلىگى ەلدە تاعى ءبىر ادامنان كوروناۆيرۋس تابىلعانىن حابارلادى. ۆەدومستۆو تاراتقان حابارلامادا ۆيرۋس جۇقتىرعان ادام نۇر-سۇلتاندا تىركەلگەنى ايتىلعان. 

وسىلايشا ەلدە ىندەت جۇقتىرعان ازاماتتار سانى 54-كە جەتىپ وتىر. بۇعان دەيىن نۇر-سۇلتاندا – 28 ادام، الماتىدا – 22 ادام، قاراعاندىدا – 2 ادام، الماتى وبلىسىندا 1 ادام ەمدەلىپ جاتقان بولاتىن. 

قازاقستاندا Covid-19 كوروناۆيرۋسىن جۇقتىرعاندار العاش رەت 13 ناۋرىزدا انىقتالعان. كەيىن، 15 ناۋرىزدا – ۆيرۋس جۇقتىرعاندار سانى سەگىز ادامعا جەتكەندە پرەزيدەنت قاسىم-جومارت توقايەۆتىڭ جارلىعىمەن ەلدە 16 ناۋرىز تاڭعى سەگىزدەن 15 ءساۋىر تاڭعى جەتىگە دەيىن توتەنشە جاعداي جاريالانعان بولاتىن. ال 19 ناۋرىزدان باستاپ ەلدىڭ ەكى ءىرى قالاسى – نۇر-سۇلتان مەن الماتى كارانتينگە جابىلدى.